DNA testing sa body parts malangay

Mga kabanay sa na-missing sa siyudad sa Naga landslide, ug niadtong mga kabanay kansang parte sa lawas ang nangawala, ang padayon nga magbangutan ning’ Pasko.

Kay pag-ila sa mga napalgan nga nagkadaiyang parte sa lawas pinaagi sa DNA testing, hangtod karon wa pa kasugdi.

Kini ang giangkon sa medico-legal officer sa National Bureau of Investigation sa Central Visayas, Dr. Rene Cam.

Duha na ka bulan ang nilabay atol sa nahitabo nga pagdahili sa yuta sa barangay Tinaan, Syudad sa Naga, diin gawas sa 78 ka mga natala nga namatay, duha pa ang na-missing.

Aduna usab nga na-recover sa mga search and retrieval team nga mga nagkadaiyang parte sa lawas ang hangtod karon wa pa mahibaw-i kon kang si kinsa.

Matod ni Dr. Cam nga aduna sila karon 16 ka mga parte sa lawas nga gikinahanglan nga ipaubos sa deoxyribonucleic acid (DNA) test, apan nagkantidad og P2.4 milyones ang pagpaubos sa 50 ka mga parte sa lawas alang sa DNA testing sa kauluhan.

Naglangkob na niini ang reagent chemical.

Hinungdan nga usa sa rason nga nituyo si Cam sa ilang uluhang buhatan, kagahapon (Nov. 26) aron sa paghangyo kon mahimo ba nga idungan sa mga ipa-DNA test sa mga parte sa lawas sa Itogon, Benguet.

“Ang loading man gud (para sa DNA) ang minimum 50, ang 50 costs 2.4 million pesos, sa reagent (chemical). So dunganon nato na, ato ihangyo nga idungan sa Itogon,” matod ni Cam.

Lima ka adlaw sa wa pa nahitabo ang landslide sa Tinaan, City of Naga, unang kapin sa 60 usab ka mga kinabuhi ang nakalas sa pagdahili sa yuta sa Ucab, lungsod sa Itogon, Benguet, Septiyembre 15.

Giangkon ni Cam nga molungtad pa og pipila ka buwan una mogawasang resulta.

Apan iyang’ gipasalig nga ilang gipaningkamutan nga mapadali kini ug di ra molanat og tuig, alang sa mga kabanay kansang minahal sa kinabuhi ang hangtod karon padayon pa nga missing o ang uban putol ang uban parte sa lawas sa dihang’ napalgan.