Druga motibo sa pagpatay sa jail guard sa CPDRC; warden nanghunaw

Dunay kalambigitan sa ilegal nga druga ang usa sa gitan-aw karon sa Guadalupe police station sa nahitabong pagpusil-patay sa usa ka jail guard niadtong Nobiyembre 25 sa Happy Valley, Barangay Guadalupe sa syudad sa Sugbo.

Si Jessie Castañares, 33, nga taga E. Sabellano St,. Barangay Pardo gisundan sa riding in tandem sa dihang padulong kini nga mopalit og tambal pasado alas 2:25 sa kaadlawon. Si Castañares na-assign sa Cebu Provincial Detention and Rehabilition Center (CPDRC).

Matod ni Sr. Insp. Dexter Basirgo hepe sa Guadalupe police station nga nagpadayon pa ang iyang mga imbestigador pagpanghipos og kasayuran ilabi na sa pamilya niini.

Giingong walay nadawat nga hulga ang biktima sa wala pa mahitabo ang pagpamusil sa biktima.

Apan ang igsuon sa biktima nga nahinabi sa mga sakop sa Guadalupe police station mitug-an nga sa milabayng mga semana mikalit lang pagka hilomon ang biktima nga naka pakurat kanila.

Wala usab kini mihatag og kasayuran nga adunay tawo nga nagsunod-sunod kaniya nga maoy nakaingon nga nausab ang batasan niini.

Sa gihimong background investigation matod ni Sr. Insp. Basirgo nga niadtong buwan sa Oktubre hangtod Nobiyembre sa miaging tuig nasuspenso matod pa kini sa iyang trabaho human gilambigit sa pagpamaligya cellular phone sa sulod sa CPDRC.

Gipasanginlan usab kini nga nagpalusot og illegal nga drugas sa bilangoan gani hangtod karon nagpadayon ang imbestigasyon sa kadagkoan sa CPDRC kaniya.

“There is a big possibility nga naa gyud ni kalabutan sa ilegal nga drugas so mao na ang atung nakuha nga information,” matod ni Sr. Insp. Dexter Basirgo.

Adunay giingong saksi sa maong panghitabo nga mao usab karon nga kuhaan sa pamahayag sa mga imbestigador nga maoy maka hatag sa giya sa kapulisan.

Duha ka mga lalake nag jacket og itom nga sakay sa motor ang mikalit sa pagpusil sa biktima tumong sa ulo ug lawas niini.

Gisubay usab nila ang mga CCTV camera sa dapit kung aduna bay naka kuha aron maoy ilang basehan sa pag ila sa mga suspek.

NANGHUNAW

Samtang, ang warden sa CPDRC gipakamagay lang ang pagkapatay na sa tulo ka mga jail guard ubos sa iyang pagdumala.

Ikatulo na nga jail guard sa CPDRC si PG1 Jessie Castañares nga napatay ubos sa pagdumala ni Warden Reynaldo Valmoria sa prisohan.

Gipatay siya sa mga wala mailhing responsable naidtong Dominggo sa kaadlawon. Sa inisyal nga imbestigasyon, posibleng may kalambigitan sa ilegal nga drugas ang krimen.

Unang napatay niadtong Septiyembre 13 ang mga jail guard nga silang Bernie Bayutas ug Joel Teves, samtang paingon sila sa korte kauban ang high-profile inmate nga si Jerryfer Perigrino, nga maoy gituohang actual target sa pagpamanhig.

Matod ni Valmoria, bisan niadtong wala pa siya ni-asumir pagka-warden, problema na ang drugas sa CPDRC.

Mas naugkat lang kini atol sa iyng pagdumala tungod sa regular niya nga mga min greyhound operation.

Dugang niya, posibleng naatlan lang usab nga sa iya lang administrasyon napatay ang maong mga jail guard.

Gitumbok ni Valmoria nga nagsugod lang pagpamatay sa mga jail guard dihang nakuhaan ug drugas ang inmate nga si Perigrino ug iyang gikanta ang laing drug suspect nga si Alvaro Alvaro alyas Barok isip maoy nagpasiugda sa illegal-drug trade sa prisohan.

May mga spekulasyon nga gipamatay ang maong mga jail guard kay wala na sila makatabang sa ilegal nga kalihukan sa gitabangan nila nga mga piniriso tungod sa ka-istrikto na sa seguridad sa CPDRC ubos sa pagdumala ni Valmoria.

“Ako gyung gipaningkamotan (nga wa’ na’y makalusot) kay mao man gyud ni atong tuyo unta. For the good bitaw ni,” niingon si Valmoria.

Sa laing bahin, pahinumdom karon ni Valmoria sa iyang mga sakop nga jail guard nga dili gyud mobiya sa ilang mga duty o pwesto kon wala mananghid ug labaw na kung walay relibo kaniya.