Ibalik ang ROTC

ROTC. Dako kong uyon sa sugyot ni Presidente Duterte nga ibalik ang military training sa tanan nga mga eskuylahan. Kadtong mga nag-edad 50 pataas nakasuway ug dunay kasinatian sa kaayo sa military training. Sa high school ang tawag kaniadto Preparatory Military Training (PMT) ug ang sa college Reserve Officer Training Corps (ROTC) unya nahimo nga Citizens Army Training (CAT).

Dihang nakalingkod na si kanhi Presidente Cory Aquino ug tungod sa sugyot sa mga walhon nga sakop sa iyang kabinete nahimo na nga opsyonal ang military training ug gipulihan og community service. Ang lain rason nga giwagtang ang CAT tungod sa reklamo nga dunay dili maayo nga mga panghitabo.

Sa akong mga ka-edad labina kadtong nakahuman og PMT ug ROTC makasaysay nga nakapalambo kini sa among pamatasan ug disiplina. Nakahatag usab og kahigayonan sa kadtong mga nag-advance officer sa ROTC nga makasulod ug mahimong opisyal as atong armadong kusog.

Gisulti ni Presidente Duterte ang iyang gusto nga ibalik ang ROTC sa kolehiyo atol sa iyang diskurso sa 35th founding anniversary as Army Reserve Command (ARESCOM) didto sa Camp Gen. Mariano Riego De Dios, Tanza, Cavite. Gihangyo ni Presidente Duterte ang kongreso nga dalion og pasar ang “Reservist Employment Rights Act”.

Gidasig usab ni Presidente Duterte ang kongreso sa pagpasar og balaod nga mandatory ang ROTC sa Grades 11 and 12, nga sa daan nga kurikulum sa kolehiyo first ug

second year, aron ma-edukar ang atong kabatan-onan sa patriyotismo ug paghigugma sa atong nasud.

Usa ni ka dakong kamatuoran nga dihang nawagtang na ang military training (PMT, ROTC ug CAT) sa high school ug kolehiyo lahi na kaayo ang pamasatan (di hinuon tanan) o panglantaw sa atong mga estudyante kabahin sa patriyotismo ug paghigugma sa atong nasud. Gani, dunay uban mga kabatan-on nga nawad-an na sa maayong gawi ngadto sa ilang ginikanan tungod sa kakuwang sa disiplina.

Ang disiplina-militar sa eskuylahan nakatabang sa pagdisiplina sa mga estudyante ug labina sa pagtulon-an nga patriyotismo, nga karon morag wa na sa panumduman sa atong mga kabatan-onan. Kadaghanan kanila mao na lang paharuhay ug mahadlok na gani mainitan. Sa among pagbansay kaniadto sa ROTC, wa nako gi-igsapayan ang mokamang ug moligid sa init kaayo nga semento sa grounds sa among University of the Visayas.

Ang numero uno nga mibabag sa military training sa mga eskuylahan ang kadto rang pundok sa mga walhon kay alang kanila ang military training sa mga estudyante usa ka militarisasyon nga pagtulon-an nga iya sa Estados Unidos sa Amerika.

Nahibung gyud ko kay ting-duty man unta na niya nang orasa. Gaunsa man diay na siya didto?”

- CPDRC warden Reynaldo Valmoria

Those projects are proposed by the Philippine side, are economically viable and are positive for the Philippine economy. There is no danger of a so-called debt trap.”

- Tan Qingsheng, Charges d’Affaires sa Chinese Embassy sa Manila.