Naigo sa bayot

Dear Noy Kulas,

Tagoa lang ko sa ngan nga Gina, 26 years old ug bag-o lang nakatrabaho diri sa Cebu. Hilig ko og gig sukad sa high school pa ko. Until now magsige gihapon ko og anha og bar aron maminaw sa mga banda.

Sa mga gig nako nakaila ang usa ka bayot. Taguon lang nato sa ngan nga Niel. Kini si Niel dunay mga barkada nga bayot ug babaye. Bayot siya nga tinuod kay mopatol siya og mga lalake. Mogasto siya og inom sa boys. Apan naunsa bang pagkaunsaa, nagkakami man.

Ingon ani ang events, Noy, why naabot mi ani karon. Nagkuyog mi og panguli kay namiya ang among mga kauban sa amoa. Didto siya matulog sa akong kwarto nga giabangan. Kompyansa ra ko kay bayot lagi. Pagpanghigda namo, nidug siya sa akoa while ako way malice kay nagtuo ko nga babaye siya.

Motuo ka o di, Noy, iya kong gihinol hinol until ni-kiss siya nako. Tingali kay nakainom ko, ni-okay ra ko. Diha na nagsugod nanginit ko ug basin tingali pud siya, maoy nahitabo. Naay nahitabo ato nga night namong duha. Pagka buntag, maora lang mi og wala pero, kon magkuyog mi og gig nya kaming duha pulos nakainom, naay mahitabo namo.

Ang akong kahadlukan karon kay nagduda ko mabdos ko kay wa na ko tungahi. Naglibog ko kon ako ba siyang sultihan o di. Makadawat ba kaha siya nga nakapamabdos siya bisan bayot siya? Please, Noy, tambagi ko unsa ang akong buhaton. Basin mapatyan ko sa akong parents kon tinuod nga mabdos ko unya ang papa bayot pa gyud. Naglibog ko unsao nako ning akong situation.

GINA

Gin,

Daghan nang mga bayot nga nakapamabdos og mga babaye. Bisan unsaon, part sa bayot lalake. Naay time nga mahimo na silang lalake mao nang di makompyansahan. Naa gani mga bayot nga closet, nagminyo, nakaanak, apan padayon ang pagpang lake. Tago-tago lagi.

Kon mabdos ka, sultihi na si Niel sa imong sitwasyon. Naa na man kaha na siyay work, kinahanglan nga masegurong mosuporta siya sa imong pagsabak ug sa bata later. Lain sab kaayo kon di siya moangkon nga siya ra man kaha ang nakahilabot nimo. Wa man ka maghisgot nga duna kay uyab ug nahilabtan sab ka. Niana maglibog ka gyud kinsa ang amahan.

Unya sunod nimong sultihan ang imong parents. Sama sa ubang parents, masuko na sila, pero sa sugod ran a. Basin mahimuot pa na sila kay sa tanang lalake nga hayan nakarelasyon mo, diha ka pa sa bayot naigo. Kon ang bayot maayo sa pamilya, segurado kong mangamahan na. Naa gani uban nga nanagop, kana pa naa siyay anak. Kana iya gyud nga dugo.

Ayaw kahadlok. Ang tanang mga problema molabay lang.

NOY KULAS