Your smile, your love
Nakita ko na sab ang nindot nga smile ni Ronnel. Milubyok ang duha ka dimples sa iyang mga aping nga nakapasamot sa iyang kaguwapo. Aside from that, ang iyang mga mata morag kanunay nagpahiyom. Madanihon gyud nga pagka lalaki si Ronnel.
Miwara-wara siya sa iyang kamot nako. Diha siya sa ilang terrace sa two storey nilang balay, ug ako nia sab sa among terrace sa two storey sab namong balay. Dugol ra ang among balay, ang koral nga semento ra ang nag-uwang ani.
Kada buntag parehas karon, mag-exercise si Ronnel sa ilang terrace. Mag-barbell siya. Dagko siyag mga braso ug busok ang iyang dughan. Lalaki kaayo siyag hitsura. Ug naandan ko na nga momata og sayo aron tan-awon si Ronnel sa iyang pag-exercise.
Maayo ug buotan si Ronnel nako. Hilom kong nangandoy nga unta mahigugma siya nako. Apan mahunahuna ko sab nga ako ra ba kaha ang daginuton ni Ronnel? Na, bati man kog nawong. Kabayuon og porma ang akong nawong, taas og suwang. Apan duna man sab koy ikapanghambog. Nindot og porma ang akong lawas. Gawas ani, bugdo kog sampot, lingin ug puti ang akong mga paa, ug husto sa gidak-on ang akong dughan.
Apan igo na ba kaha kining hinungdan aron higugmaon ko ni Ronnel? Nagduha-duha ko nga mahitabo kini. Kasagaran gud sa mga lalaki, ang nawong sa babaye ang una nilang tan-awon, kon guwapa ba kini. Nakapanglingo ko. Kon ingon ani si Ronnel, na, di gyud siya madani nako tungod sa bati kong nawong. “Hoy!”
Nakugang ug nakalingi ko. Ang pilya ko diay nga igsuon ang diha sa akong luyo nga nagkatawa. Giyam-iran ko siya. Seguradong sulug-sulugon na sab ko ni Nymfa. Duha ra ming magsuon ug manghod ko si Nymfa.
“Wa gyud ka tak-i sa sigeng tan-aw anang imong prince charming, Te Grace? Ayaw na siya bantayi kanunay, uy, kay way moilog ana niya nimo?”
Gihan-an kog kusi sa kilid ang akong igsuon. Abtik siyang nakalihay ug mikatawag kusog.
“Ikaw, ha? Hinaya nang imong tingog kay basig madungog ka ni Ronnel?”
“May nang makadungog siya aron makahibawo siya nga secret love nimo siya, Te.”
Mitan-aw kog usab kang Ronnel. Mipahiyom na sab siya nako. (SUMPAYAN)