Velarde, Atillo sulod sa Cepca Grand finals
Naangkon nila ni Edilberto Velarde Jr. ug Jose Atillo ang katapusang duha ka mga luna sa Grand Finals human nila gipatigbabawan ang katapusang elimination round sa Cebu Executives and Professionals Chess Association (Cepca) Monthly Tournament niadtong Dominggo, Nobiyembre 25, sa Barracks Chess Club sa Robinsons Galleria Cebu.
Naghari si Velarde Jr. sa kompetisyon nga wala’y pilde human sa lima ka rounds.
Nakahipos siya og 4.5 puntos gikan sa upat ka mga daog ug usa ka tabla.
Si Velarde, 47, kinsa maoy tag-iya sa the Barracks Chess Club ug Edilberto Velarde Construction, maoy representante sa buwan sa Nobiyembre.
Sa iyang bahin, si Atillo igo ra untang nahiluna sa ikatulong dapit dala ang 4.0 puntos apan naangkon gihapon niini ang katungod sa pagrepresentar sa buwan sa Disyembre.
Kini gumikan kay ang nakasakmit sa ikaduhang dapit nga mao ang anak ni Velarde nga si Jerish John, 14, usa man ka guest participant.
Sa grand finals, sila si Velarde ug Atillo makig-uban sa nahiunang qualifiers nga sila si Eduardo Dela Torre (Enero), Mario Bustillo (Pebrero), Rogelio Enriquez Jr. (Marso), Joselito Loques (Abril), Zilverstein Torres (Mayo), Salazar (Hunyo), Arnolito Cadiz (Hulyo), Neal Amores (Agusto), Richard Ouano (Septiyembre) ug Percival Fiel (Oktubre).
Nagkanayon si Cepca secretary Jun Olis nga karong adlawa, maghugpong ang mga opisyal sa asosasyon pangulohan sa ilang presidente Jerry Maratas aron ihan-ay na ang pagpahigayon sa grand finals.