Santisima, ang laing paglaom sa boxing sa nasod
Nakahatag og saktong lingaw sa mga boxing fans ang away nila ni Jeo “Santino” Santisima ug Kevin Jake “KJ” Cataraja niadtong Sabado sa Pinoy Pride 45 sa IEC Convention sa Mabolo.
Dili mga patsy fighters kon dili tinud-anay gyud nga mga Mexican warriors ang ilang mga nakontra nga kon wa pa silay saktong praktis ug preparasyon, dako ang posibilidad nga sila maoy mangundang.
Si Cataraja kansang record miinat na ngdto sa 9-0, 7 ka knockout, nagtuo nga sama sa iyang pito ka mga kontra, ma-knockout ang Mexicanong si Hugo Reyes sa sayong bahin sa ilang away, apan gihilam-os ra man ang iyang mga kinumo.
Nakabantay sa kalig-on sa kontra, wa na lang gyud niya pugsa ang iyang kaugalingon nga matumba si Reyes kon dili naghuwat lang siya sa saktong panahon.
Napildi man tuod niya ang Mexicano, apan miagi usab kini sa makutas nga binukbokay.
Way kalahian ang nasinati usab ni Santisima ug sa laing Mexicano nga si Uriel Lopez kay gikan pa lang gani sa first round, way puas nga nagsigig linabyugay sa ilang mga kinumo ang duha.
Kay lagi pulos nanganti og knockout nga kadaugan, way gaksanay ug wala say daganay.
Maingon nga malupig man tuod ang Mexicano sa palutsanay sa mga solidong kumo, apan di sab kini mabintahan sa mga counterpunches nga makasungag usab ni Santisima.
Ang nakapasamot og ka kulba sa panag-engkuwentro mao nga bisan sa naghinapos na nga bahin, nagpadayon ang kaagresibo ni Lopez ug maklaro nga anaa pa gihapon kini igong kusog nga makapatumba sa bag-ong sensational knockout artist sa mga Ala Boys.
Kadtong awaya, nakapahinumdom kanako sa interim WBA super flyweight title fight ni AJ Banal ug ni Rafael Concepcion niadtong 2008 diha sa Cebu Coliseum.
Way round nga gidag-an si Concepcion nga perming masabak sa mga solidong kumo apan pag-abot sa ikanapulo nga round, wa makasugakod ug sa kalit lang naluya ug nalup-og si Banal kinsa surprisang nisurender sa away nga nakapasagmuyo sa mga local boxing fans.
Pero sukwahi sa gipakita ni Santisima, hangtod sa katapusang hut-ong sa kombati iyang gipruyba ang tinudanay nga kasingkasing ug kaisog sa usa ka champion.
Dili kuwestiyon ang kaligon ug determinasyon sa 22-anyos ug lumad nga taga Aroroy, Masbate City apan sama sa giingon ni Michael Aldeguer nga daghan pa siya og angay nga makat-onan sa dili pa kini moaway alang sa world title.
Atong girespetuhan ug gihangop ang pamahayag ni Aldeguer, apan atong panghinauton nga ikonsiderar usab niya ang peak o ang nagsaka nga karera ni Santisima.
Sa laktod nga pagkasulti, dili palabyun ang oportunidad samtang nagkainit pa ang iyang abilidad.
○○○
Akong kinasingkasing nga pahasubo ngadto sa banay sa atong higala nga si coach Fredo Enriquez kinsa sa edad nga 72 anyos mipanaw na sa laing kalibutan.