Lakers napukan na sab sa Magic
Nakaipsot ang Orlando Magic sa pagpanghudlat sa host Los Angeles Lakers sa hinapos nga bahin aron usban pagpukan ang multi-titled squad, 108-104, sa 2018-19 season sa National Basketball Association (NBA) kagahapon sa Staples Center sa Los Angeles. Ang Magic, nga ningmakmak
sa Lakers, 130-117, sa premiro nilang duwa niadtong Nobiyembre 17, ningsubay og makuyaw nga dalan una nila naangkon ang kadaugan ning higayuna.
Naglabaw ang Magic og 14 puntos, 88-74, sa sayong bahin sa 4th quarter apan hinayhinay kining gikitkit sa Lakers hangtod nga natabla nila ang duwa, 104-104, pinaagi sa duha ka freethrows ni LeBron James sa nahabiling 2:24 minutos.
Human sa hapit duha ka mga minutos nga hinugtanay sa bakus, nakalabaw og balik ang Magic pinaagi sa layup ni Terrence Ross, 106-104, sa nahabiling 34 ka mga segundos.
Sa return play, wala masulod ang jumpshot ni Lakers shooting guard Kentavious Caldwell-Pope ug nakuha sa Magic ang defensive rebound.
Sa nahabiling 10 segundos, nainat sa Magic ang ilang labaw ngadto sa 108-104 pinaagi sa hansak ni Aaron Gordon gikan sa assist ni Ross.
Wala na nakabangon ang Lakers niadtong higayuna.
Ang Magic, nga mingsaka sa10-10 nga rekord, gipangulohan ni Nikola Vucevic pinaagi sa iyang 31 puntos ug 15 rebounds.
“We’re trying to build something, and wins like these can really help you build some momentum,” asoy ni Vucevic.
Si Gordon nidugang og 17 puntos alang sa Magic samtang niamot og 16 puntos si Ross.
Ang Lakers, nga nahagbong sa 11-8 nga rekord, gipangulohan ni James pinaagi sa iyang 24 puntos, nitunol og 21 puntos si Kyle Kuzma samtang nihatag og 17 puntos si Brandon Ingram.
Gibasol sa Lakers ang huyang nilang depensa nga maoy hinungdan sa ilang kapildihan.
“Defensively, we kind of broke down and the energy level was a little lower than our expectations, and they took advantage of that,” matod ni James.
Si Vucevic, sama sa premirong panagharong sa duha ka mga kampo, mao na sab ang naghatag og grabeng labad sa ulo sa Lakers gikan sa sinugdanan hangtod sa katapusan.