BOHOL PANGLAO INT'L AIRPORT SUBHAN
Subhan karong adlawa ang P8.9 bilyunes nga Bohol Panglao International Airport sa Panglao karong alas 3:00 sa hapon.
Si President Rodrigo Duterte maoy pinasidunggang dinapit uban sa mga opisyal sa kagamhanan ug mga negosyante sa pag-abli sa bag-o ug modernong airport sa Bohol.
Dakong garbo kini sa probinsiya sa Bohol nga nakaangkon sa labing unang “eco-airport” sa Pilipinas subay sa paggamit og LED lights, solar power, adunay, wastewater treatment facility, water collection ug storage system, energy-saving type air-condition system, installation sa wooden louvres ug low emissivity coating curtain wall glazing (glass) sa PTB ug gangway.
Lakip sa iyang pagka-eco friendly mao ang pagtanom og mga kakayohan nga dul-an sa 1,700 ka mga punoan.
Ang bag-ong airport sa Bohol mokomplimentar sa airport sa Sugbo sa pagdala og daghang turista sa Central Visayas.
Gilauman nga ang naasoy nga airport mas mopapaspas sa pagtuyok sa ekonomiya sa Bohol tungod sa maayong pasilidad sa transportasyon.
Ang Bohol usa sa mga nagunang destinasyon sa turismo sa nasod tungod sa iyang natural nga bahandi sa kinaiyahan sama sa mga puting beach resorts mismo sa isla sa Panglao, ang nabaniog sa kalibotan nga Chocolate Hill, ang maanindot nga suba, ang labing gamay nga unggoy sa tibuok kalibotan nga Tarsiers ug uban pa, lakip sa mga karaang bahandi kaliwat sa mga karaang simbahan ug kabalayan.
Naila usab ang Bohol sa iyang mga lamiang pagkaon sama sa kalamay ug uban pa.
Ang dakbayan sa Tagbilaran maoy ulohang dapit sa Bohol, diin sentro sa ekonomiya ug pulitika sa lalawigan.
Ang Tagbilaran kapin lang sa oras ang biyahe sa fastcraft gikan sa dakbayan sa Sugbo.