Desinyo sa BRT project susihon og balik
Gitan-aw og balik sa bagong gi-hire nga French technical support consultant sa Department of Transportation ang detailed engineering design nga giandam sa kanhi Korean consultants sa Bus Rapid Transit (BRT) system.
Si Mark Richmund de Leon, undersecretary for road transport and infrastructure sa DOTr, namahayag nga duna nay giandam nga detailed engineering design ang Kunhwa Engineering and Consultancy, ang Korean firm nga unang gitahasan alang sa desinyo sa BRT system nga ipatuman sa dakbayan sa Sugbo.
Apan wa maapil sa desinyo ang Integrated Inter-Modal Transport System (IITS) nga kabahin sa basket of solutions nga gipresentar sa DOTr ug Office of the Presidential Assistant for the Visayas aron pagsulbad sa suliran sa kahuot sa trapiko sa Sugbo.
Apil niini ang Light Rail Transit (LRT), Mono Rail Transit (MRT), point-to-point bus system, ug Intelligent Transportation System.
“Kailangan i-revalidate ang assumptions, i-revalidate ang mga interconnections so that commuters will not be inconvenient in various transfer,” pasabot ni de Leon isip usa sa dinapit nga mga mamumulong sa paglusad sa pasiunang 22 ka modernong public utility vehicles (PUV) kagahapon, Nobiyembre 26 sa Robinsons Galleria Cebu.
Siya niangkon nga bisan og nalangay ang pagpatuman sa P16.3 bilyones nga BRT system project dinhi sa Sugbo, gusto nila maseguro nga ma-integrate na sa bag-ong sistema ang ubang IITS sama sa LRT, MRT ug Sky Train nga ibutang sa Metro Cebu aron mas sayon alang sa mga pasahero diin ang BRT stations naay interconnection sa LRT.
Sumala ni de Leon ang bag-ong TSC kay dunay mga kasinatian sa pagtrabaho sa lainlaing mga LRT ug BRT projects sa tibuok kalibotan.
Matod niya, sa miaging
pre-feasibility study, ipatuman phase-by-phase ang BRT system project hinungdan nga gitahasan nila ang bag-ong TSC nga mangita og mga dalan sa siyudad sa Sugbo diin luag ang dagan sa trapiko ug lapad ang mga karsada sama sa South Road Properties aron dinhi ipatuman ang proyekto.
Ang 23 kilometros nga rota sa BRT magsugod sa Barangay Bulacao ug motadlas sa N. Bacalso Avenue, South Road Property, Osmeña Boulevard, N. Escario Street ug Governor Cuenco Avenue.