PAG-FILE SA EXEMPTION SA ELECTION GUN BAN
Sugod Disyembre 1, mahimo nang moduso ang mga sibilyan og application alang sa Certificate of Authority ngadto sa Committee on the Ban on Firearms and Security Personnel sa Comelec Central Office, kun buot nila nga ma-exempt sa election gun ban.
Base sa Comelec Resolution No. 10446, ipatuman ang gun ban sa Enero 13 hangtod Hunyo 12, 2019 o 90 ka adlaw sa dili pa ang eleksiyon ug 30 ka adlaw human niini.
Matod ni Election Supervisor Lionel Marco Castillano, kadto lamang mga tawo nga dunay seryusong hulga sa kinabuhi ang mahimong ma-exempt sa gun ban. Kinahanglan pa usab kini nga i-assess ug i-verify sa kapulisan.
Ang mga sibilyan nga wa’y hulga sa kinabuhi apan aktibo sa mga shooting competition mahimo ra usab mangayo og exemption sa gun ban.
Limitado ang pagdala nila og armas gikan sa ilang pinuy-anan paingon sa dapit diin ipahigayon ang kompetisyon ug kinahanglang sakop siya sa usa ka shooting organization.
Dugang ni Castillano, ang mga gwardiya mahimo sab nga ma-exempt sa gun ban apan kinahanglang moduso og application alang niini ang ilang security agency.
Sa Disyembre 5, ang kapulisan sa Central Visayas ug ang mga tinugyanan sa Comelec magtigum alang sa pagpangandam sa pagpatuman sa gun ban.
Nagpasalamat si Castillano sa kapulisan nga subsob nga nagpahigayon ug mga
checkpoint bisan og wala pa ang election period sanglit makatabang man kini pagpakgang sa pagsiaw sa mga posibleng gun for hire ug paggamit sa mga loose firearm.
Ang national mid-term elections gikatakda karong Mayo 20198.