‘PUSHER’ PATAY SA BUY BUST
Namatay ang usa ka gikatahapang bigtime pusher nga giingong gun-for-hire dihang nisukol sa kapulisan Martes sa buntag, Nobiyembre 27.
Iyang upat ka mga kauban napusasan atol sa buy bust operation sa Brgy. Jaclupan, Dakbayan sa Talisay.
Si Junie Macaraya, alilas “Clay”, taga Sitio Mananga 1, Barangay Tabunok, Talisay City, dead on arrival sa tambalanan.
Si Macaraya namatay human giingong nisukol nila ni Sr. Inspector Alejandro Batobalonos, hepe sa Provincial Drug Enforcement Unit (PDEU) ug sa Provincial Intelligence Branch (PIB) sa Cebu Provincial Police Office (CPPO).
Gipangpusasan ang mga kauban ni Macaraya nga sila si Engilie Enjaine Cosep, 30, usa ka tomboy; Eusebio Abalo, 49; Edison Esconas,34; ug Edu Manzano,23, pulos taga dakbayan sa Talisay. Si Batobalonos niingon nga dugay na nilang gipanid-an si Macaraya, apan idlas.
Matod niya nga gawas sa pagka-pusher, nalambigit sab kini sa laing mga kremin.
Matod niya nga igo lang silang mga pulis midepensa sa kaugalingon dihang nikuha sa iyang armas si Macaraya ug giunhan nila sa pagpusil.
Ilang nakuha sa possession niini ang usa ka kalibre .45 nga armas,10 ka medium nga putos, walo ka gagmay nga putos sa gituohang shabu nga nitimbang og 53.2 gramos, nga mobalor og P627, 760.
Nakuha sa kapulisan ang P8,000 buy bust money, halin nga P1,600 ug paraphernalia.