P8.1B budget sa 2019 giuyonan sa Konseho
Giaprobahan na sa Konseho ang P8.1 bilyones nga annual budget sa Dakbayan sa Sugbo para sa 2019.
Atol sa final deliberation kagahapon, Nobiyembre 27, hapsay ang pagpalabang sa City Ordinance nga giduso ni Konsehal Margarita Osmeña diin ang P7.92 billion adto ibutang sa general fund proper ug laing P1.027 bilyones alang sa special accounts.
Sa wa pa giaprobahan sa Konseho ang pundo, niagi una kini og budget deliberation pinangulohan sa committee on budget and finance diin si Osmeña ang chairman.
WA MASULBAD
Si Konsehal Joel Garganera, kanhi chairman sa committee on environment sa Konseho nipadayag sa iyang kasagmuyo pinaagi sa iyang pagpasupot sa privilege speech.
Giyagyag ni Garganera nga taliwa sa kadako sa pundo alang sa pagkolekta sa basura sa miaging tuig diin moabot og kapin o kulang P400 milyones, wa gihapon masulbad ang problema.
Iya usab gihatagan og gibugaton ang problema sa baha, ug kahuot sa trapiko diin iyang gibasol ang administrasyon ni Mayor Tomas Osmeña kinsa nibasol kanila gumikan sa giingong pagbabag.
Apan iyang gihulagway nga kini ang pagpanghunaw sa mayor gumikan sa iyang kapakyas pagsulbad sa problema.
Ang giduso ni Osmeña nga proposed annual budget way iban atol sa budget deliberation sanglit nakuha sa administrasyon ang mayoriya sa konseho (10-8) apan gihulagway ni Garganera nga nawagtang ang check and balance sa konseho.