12 ka tawo, patay sa lungon luwas

Luwas ang tanang dose ka mga pasahero ug ang usa ka patay nga anaa sa lungon human masudli og tubig ang motorbanca nga gisakyan niini nga paingon unta sa Masbate kagahapon sa buntag, Nobiyembre 27, sa Sitio Guimbitayan Logon, lungsod sa Daanbantayan.

Ang mga mananagat nga anaa duol sa dapit mao ang nitabang pag-rescue sa mga pasahero sa MBCA nga katunga nang nasudlan og tubig alas 8:30 sa buntag.

Gikan ang MBCA sa Agos, Lapu-Lapu City diin nibiya niadtong Lunes, Nobiyembre 26, sa alas 10 sa gabii.

Matod ni Petty Officer 3rd class Reynaldo Cabig sa Coast Guard Hagnaya, San Remigio Sub-station nga 500 metros na lang gikan sa baybayon sa Malapascua ang nahitaboan sa pagtunlod sa bangka.

Gipanag-iya ni Leonardo Paradero, 89, ang MBCA NeyAnn, diin usa kini ka pribado nga motorized banca.

Samtang gimaneho kini ni Ricky Paradero, 48.

Dugang ni Cabig nga tungod sa kadagko sa bawud, nasudlan og tubig ang dung sa bangka.

Duha ka bangka ang niluwas sa maong mga pasahero diin mga mananagat ra usab kini sa dapit.

Lakip sa mga pasahero nga sakay sila si Leonardo; Rogelio Paradero, 60; Roberto Paradero, 50; Dylinda Padilla, 56; Norma Odiña, 58; Jerlita Cataluna, 46; Thelma Ponce, 41; Nelson Paradero, 57; Keith Ponce, 10; Karen Matulin, 15; ug Ivy Odenia, 22, kinsa tanan taga Claveria, Masbate, Province.

Ang patay nga anaa sa lungon naila nga si Dominga Paradero, asawa ni Leonardo.