Pulis ‘nangilkil,’ gi-entrap sa NBI 7

Pulis nga sakop sa Bayawan City Police Station nga gipasanginlang nangilkil nasikop sa entrapment operation sa National Bureau of Investigation (NBI) sa Dumaguete City Martes sa buntag, Nobiyembre 27.

Gikompirmar sa head agent sa NBI Dumaguete nga si Atty. Jose Ermie Monsanto ang pagkasikop ni PO3 Roberto Abadiano sulod sa buhatan sa dyRL-FM sa siyudad sa Dumaguete, Martes, Nobiyembre 27, 2018, diin giingong gibiktima niya ang tag-iya sa sibyaanan.

Ang tag-iya ug station manager sa dyRL nga si Rene Ledesma nagpatabang sa NBI tungod sa giingong pagpangilkil ni Abadiano kaniya gikan pa niadtong 2013.

Matod ni Monsanto, nadakpan sa kasong kalapasan sa election gun ban si Ledesma niadtong 2013 ug si Abadiano maoy nakadakop kaniya.

Nasang-at ug nag-ung-ong pa sa Regional Trial Court (RTC) Bayawan City ang kaso batok kang Ledesma.

Si Ledesma nipasangil nga dihang gisugdan ang husay niadtong 2013, nangayo og P20,000 si Abadiano gikan kaniya.

Kini aron nga siya isip arresting officer di na motambong sa hearing hangtod nga i-dismiss kini sa korte.

Kon dili siya mohatag sa gipangayo nga kantidad, giingong nanganti pa ang pulis nga patyon siya.

“The reason was that after receiving the amount, he won’t attend any hearing of my case and won’t testify against me, so that, according to him, my case will be dismissed. And if I won’t give money, he told me in Bisaya dialect the following words, “patyon nalang teka” (gonna kill you),” asoy ni Ledesma diha sa iyang affidavit of complaint.

Tungod kay wa pa gihapon mahuman ang kaso, di pa lang dugay, nakadawat siya og tawag gikan sa iyang abogado nga nagpahibalo nga gitakda ang laing hearing sa kaso karong adlawa, Nobiyembre 28.

Human sa ilang panagsulti sa iyang abogado, nakadawat siya og laing tawag ni Abadiano.

Siya nipasangil kang Abadiano nga nangayo na usab og laing P50,000 bugti gihapon sa di niya pagtunga sa hearing.

Nasabutan nila nga ihatag ang kwarta sulod sa estasyon dyRL sa Dumaguete.

Kagahapon sa buntag, Nobiyembre 27, gilusad sa NBI 7 ang entrapment operation ug nasikop si Abadiano.

“Wala na gyud maka-agwanta kini atong complainant, niduol sa NBI, nagpatabang,” padayag ni Monsanto. /