Pagbuto sa bomba gisusi pa; gituohang para panagat

Laoang, Northern Samar - Wa pa masayri sa mga awtoridad ang hinungdan sa pagbuto sa gituohang bomba sa Barangay Bobolosan, ning lungsod sa miaging semana.

Giila ang nangamatay nga sila si alyas Ome ug alyas Gaga, pulos taga San Antonio, Northern Samar.

Samtang ang duha nga samdan mao sila si Junjun Donato ug Nilo Cuanico, nagpuyo sa nahisgutang lugar.

Base sa imbestigasyon, nahitabo kini sa balay nga gipanag-iya ni Natalia Capas.

Ang maong balay gipaabangan sa usa ka retiradong pulis nga nga si Dario Ayes, 55.

Kauban ni Ayes sa balay ang nahisgutang mga biktima.

Sa paghimo ning balita, gisusi pa sa Explosives Ordnance Disposal team sa Northern Samar Police Provincial Office (NSPPO) ang hinungdan sa pagbuto.

Apan narekober sa dapit ang usa ka sako nga detonating cord, blasting caps ug mga fuse.

Daghan ang nagtuo nga gamiton kini sa ilegal nga panagat, apan ang kapulisan nagdumili pa pagtubag kay gihuwat ang resulta sa imbestigasyon.

Sa samang adlaw, napatay usab ang gituhoang sakop sa teroristang grupo nga Dawlah Islamiya sa Ormoc City.

Si Joseph Anulag napatay sa operasyon sa Criminal Investigation and Detection Group (CIDG) 8 ug Philippine Army sa Barangay Airport.

Nasakmit sa suspek ang usa ka Improvised Explosive Device, detonator, armas ug flag sa ISIS.

Dunay uban nga naalarma sa maong hitabo.

Apan ang Police Regional Office (PRO) 8 ug Philippine Army nagkanayon nga walay angay ikahadlok ug ikaalarma.

Matod sa PNP ug Army, padayon ang ilang gihimong intelligence gathering ug pag monitor.