Espinido nabalik sa Eastern Visayas
Palo, Leyte - Kontrobersiyal nga pulis nga si Police Chief Inspector Jovie Espenido nabalik sa Eastern Visayas.
Kini ang gikompirmar sa Police Regional Office (PRO) 8.
Matod ni PRO 8 Director Dionardo Carlos, wa pa silay impormasyon kon asa nga unit madestino si Espenido.
Apan dunay report nga adto kini ibutang sa Samar area.
Matod ni PRO 8 spokesperson, P/Supt. Bella Rentuay, Nobyembre 20, 2018 epektibo ang order of reassignment ni Espenido.
Gihimakak sa PRO 8 ang report nga tungod sa pagbalik sa ilegal nga drugaa ang hinungdan sa pagbalik ni Espenido.
Matod ni Carlos, normal lang kini sa usa ka pulis nga madestino bisan asa sa nasud.
Una pa nabalik sa Eastern Visayas, nagsilbi una nga hepe sa Virac, Cantanduanes si Espenido.
Sa dihang nadestino kini sa Ozamis, nahitabo ang duguon nga police operation batok sa pamilya ni kanhi mayor Reynaldo Parojinog nga gipasanginlan nga protektor sa ilegal nga drugas ug nalakip sa ‘narcolist’ ni Presidente Rodrigo Duterte.
Nahimo usab nga hepe sa Albuera, Leyte niadtong 2016 si Espenido diin napuhag ang Espinosa Drug Group ni Kerwin Espinosa nga miresulta sa pagka priso ni anhing mayor Rolando Espinosa Sr.
Napatay si Espinosa Sr. sa CIDG 8 nga giingong mironda sa selda niini human giingong misukol.