Balaud batok sa pagdaub o pagsunog

Balaod nga nagkasungi ang Republic Act 9003 o Ecological Solid Waste Materials Management Act kun Anti-Burning Law. Makalibog o kaha kataw-anan pa.

Pinaagi ning maong balaod ang Departamento sa Kalikupan ug Rekursos Naturales (DENR) nagdili sa pagsunog sa layang mga dahon ug basura (waste materials).

Ang sakpang nakasupak bilangguon ug pamultahon. Bilanggo gikan sa usa ngadto sa kinse ka mga adlaw ug multa gikan sa P300 ngadto sa P1,000.00.

Niingon kong nagkasungi (inconsistent) o kaha counterpointing (nagkasupakay) kay gidasig tag pagpananom og kahoy, unya di ta makasunog sa layang mga dahon nga basura.

Kay makadaot sa maayong panglawas kuno. Ang ipasabot nga patabunan lang ta sa layang mga dahon sa mga kahoy nga atong gipananom sa luyo ug atubangang tugkaran.

Busa di na lang ta mananom og mga kahoy bisan sa laguna ug kabungtoran kay di man ta kalimpyo sa layang mga dahon pinaagi sa kumon nga paagi nga mao ang pagsunog.

Dinhi sa ato wa may lapad nga kalasangan gawas didto sa Mindanao. Busa way kuyaw nga mahitabo ang wildfire (katay sunog) nga mosiphod sa atong gipuy-ang kalikupan.

Tingali ang sud sa hunahuna sa nanagpanday ning maong balaod mao ang kalikupan sa mga dakbayan. Ang maong balaod may purohan nga epektibo apan di sa probinsiya.

Di kay ang R.A. 9003 wa gyuy silbi, apan nganong wa may hugot nga pagpatuman? Gani, ang Clean Air Act wa gyuy implementasyon.

Tan-awa ang lungsod sa San Fernando dunay duha ka planta sa semento nga kanunayng nagsunog og carbon dioxide nga makadaot sa ozone layer in long term ug panglawas in short term.

Sa di madugay, ang San Fernando, ang makaluluoyng lungsod, labi na sa South Poblacion tabunan na sa abog nga makahilo (polluted) nga makadaot sa katawhan. Unsay say mo DENR?

Ang sakpang nakasupak bilangguon ug pamultahon.”