Your smile, your love
Nagpangidhat si Nymfa nga mibiya nako sa among terrace. Pilya gyud ang akong igsuon. Gisigahan ko na lang siya sa akong mga mata apan nagkatawa ko. Nahimuot ko kang Nymfa. Dasig siyang pgka babaye ug kanunay ko niyang lingawon sa iyang mga pahiyom ug pasiaw.
Unya didto na sab ko motan-aw kang Ronnel. Miwara-wara na sab siya sa iyang kamot nako. Ning higayona, gibaslan ko siya sa pagwara-wara sa akong kamot. Ambot kon unsay ipasabot ni Ronnel aning iyang maayong pagtagad nga gipakita nako. Basig giisip lang ko niyang igsuon maong kon makakita siya nako, iya kong pahiyoman, anang smile nga para nako kilig to the bones gyud sa kanindot.
Na, misamot ka-develop ang pagbati ko niya. Na-in-love na gyud kaayo ko niya.
Pagka ugma nagkakuyog mi si Ronnel sa pagsakay namog dyip sa pagpaingon namo sa eskuwelahan. Parehas ming second year college. nuon lain-lain ang university ang among gitunghaan. Nagkatapad mig lingkod. “Plite namong duha.” Mitunol si Ronnel og kuwarta sa drayber. Unya nagpahiyom na sab siya nako. “Giplitehan tika, Grace.” “Salamat, Ron.”
Ug gipahiyoman ko sab og nindot kaayo si Ronnel. Pagkanindot gyud sa akong gibati niadtong tungora. Morag naa ko sa cloud nine, nagpautaw-utaw uban kang Ronnel nga para nako, he’s my one and only love.
Porbida sab ning akong kasingkasing, uy. Nagpatuyang lag dasmag. Si Ronnel gyud ang gipili nga di man ko angayan niya. Tiaw moy bati kog nawong ug si Ronnel artistahon og hitsura tungod sa iyang kaguwapo?
Apan sagdi lang, di man sab daotan ang pagpangandoy, hilom kong nakaingon. Isipon ko na lang nga usa ka pangandoy ang hilom kong tinguha nga higugmaon sab ko ni Ronnel.
Usa ka gabii ana nga hayag ang buwan kay full moon man, nagpahayahay ko sa among terrace. Nadapit ang akong pagtagad ngadto sa among lawn. Nakadungog kog kinataw-anay. Hayag ang among lawn kay duna may suga. Sus, sila si Nymfa ug Ronnel ang akong nakita nga malipayon kaayong nagtapad pagyaka sa bermuda grass.
Usahay makita ko si Nymfa nga mohapak sa bukton ni Ronnel, ug si Ronnel sab usahay mokupot sa kamot sa akong igsuon. Wa ko makasabot sa akong gibati niadtong higayona. Morag gusto kong mohilak. (SUMPAYAN)