Paningkamot

Klasmeyt si Art ug si Marlyn gikan sa Grade 1 hangtod sa haysikol. Utokan si Marlyn nga kanunay ma-first honor sa ilang klase. Tungod kay dugay makasabot gidasig si Art sa ilagng class adviser nga seryusuhon ang pagtuon. “Art, study harder. Walay bugo kon magtuon,” tambag ni Mrs. Capio. “I will try my best, Ma’m,” ni Art. Apan bisan unsaon niya og paningkamot, 79 ra gyud ang kinadak-an niyang grado.

Hayiskol na sila dihang gibati og kaibog si Art kang Marlyn. Usa ka adlaw iyang giduol si Marlyn. “Dugay na kong nakagusto nimo. Unta di ko nimo pakyason,” esplikar niya nga gikulbaan. “Excuse me. Wa koy panahon sa lalakeng pareho nimo,” ni Marlyn nga milakaw dayon ug nangyam-id. Nasakitan si Art sa gibuhat ni Marlyn kaniya.

Human sa ilang gradwasyon managlahing dalan ang ilang gisubay. Mipadayon sa kolehiyo si Marlyn, samtang si Art mitungha sa TESDA. Nakahuman si Art sa mubong kurso nga ‘bread and pastry making’ sulod sa tulo ka bulan.

Diha na sa ikaduhang tuig sa kursong ‘computer engineering’ si Marlyn dihang nakauyab siya kang Rene. Kanunay sila mosulod sa motel hangtod namunga ang ilang pagminahalay.

“Nagsabak ko. Unta imo kini nga barugan!” hangyo ni Marlyn nga nabalaka.

“Dili pa ko andam nga magminyo,” balibad ni Rene.

Nagbulag sila si Rene ug miundang si Marlyn pagtungha. Mipauli siya sa ilang lungsod sa San Sebastian diin nag-inusara siya nga nagpadako sa iyang anak. Nagmahay siya sa iyang gibuhat.

Sa laing bahin nagtrabaho na si Art sa usa ka inilang ‘bakery.’ Naningkamot siya nga ipadayon ang pangandoy nga makahuman og kurso. Mi-eskuyla siya magabii ug human sa dugay niya nga pag-antos nahuman niya ang kursong Business Administration. Tungod kay buotan ug kugihan naminyo siya sa usa ka anak sa tag-iya sa ‘bakery’ nga iyang gitrabahoan. Nagsugod ang pag-uswag sa kinabuhi ni Art human sa iyang kaminyuon. Nakahukom siya nga magtukod og kaugalingon nga ‘bakery.’

Nanglabay ang katuigan. Sitintay nuybe ka sanga sa iyang ‘bakery’ ang iyang natukod sa Kabisay-an ug Mindanao. Wala magdugay nahimong multi-milyunaryo si Art kay namunga gyud ang iyang paningkamot.

USA ka adlaw samtang nag-abli si Art sa iyang Facebook account nasayran niya nga adunay himuon nga ‘grand reunion’ ang San Sebastian National High School atol sa ika50 nga sumad sa pagkatukod niini. Iyang gitawgan si Sam nga ka-batch sa tuig 1979. “Ako ang manubag sa tanang gastuhan sa atong batch!” pasalig ni Art kang Sam.

“Akong pahibaw-on ang atong mga klasmeyt. Akoy bahala diri nga moandam sa

tanan,” ni Sam nga nalipay sa tanyag ni Art.

Miabot ang adlaw sa ‘grand reunion.’ Daghang mga ‘alumni’ ug ‘retired faculty members’ ang nanambong. Nagkumustahay ang usag usa bahin sa kasamtangan nilang mga kinabuhi.

Nianang pagka gabii nagkapundok silang tanan sulod sa multi-purpose gym kay adunay programa nga himuon aron pasidunggan ang mga ‘alumni’ nga nagmalampuson sa ilang propesyon.

Human sa pangaliya ngadto sa Ginuo ug sa pag-awit sa nasudnong awit, gisugdan dayon ang programa. Gipaila sa ‘emcee’ ang mga ‘outstanding alumni’ sa nagkalainlaing kurso.

“Ug karon ipaila ko kaninyo ang ‘the most outstanding

alunus’ ning atong grand reunion!” matod sa emcee. “Siya way lain kundili si Art Ferrer. Siya gradwado saa Business Administration. Tungod sa iyang kakugi ug paningkamot milambo ug nahimong inila ang Art Bakeshop sa Kabisay-an ug Mindanao. Nasurprisa ang mga nanambong sa naangkon nga kalampusan ni Art.

Misaka si Art sa ‘stage’ aron dawaton ang plake sa pasidungog. Gitan-aw niya si Marlyn nga mindungo. Nausab na ang panagway sa babayeng iyang gimahal kaniadto ug gihimong inspirasyon. Sa iyang ‘response’ mipaambit siya og pipila ka pulong: “Ang tawo bisan dili utokan, kon maningkamot lang, dili imposible nga makab-ot niya ang iyang pangandoy.” Unya nagpasalamat siya sa Kahitas-an ug sa tanang nanambong nga nanindog ug namakpak sa tumang kahimuot.

(KATAPUSAN)