Sharks gipanitan sa Crusaders sa MPBL Datu Cup

Nasugamak sa dakong kapildihan ang Cebu City Sharks batok sa Rizal Crusaders, 80-57, niadtong Lunes sa gabii sa Maharlika Pilipinas Basketball League (MPBL) Datu Cup sa Ynares Sports Arena sa Pasig City.

Ang Sharks, nga natagak sa 6-10 nga rekord, nagkaguliyang sa ilawom nga bahin gumikan kay wala ang ilang pambatong sentro nga si William McAloney, kinsa adunay angol.

Pagsugod pa lang sa duwa, ang Sharks tatawng aduna na’y haw-ang sa ilawom nga bahin hinungdan nga nabiyaan dayon kini, 2-10.

Hinuon ang Sharks ni coach Titing Manalili nakamaneho paggukod ug napahak nila ang labaw sa Crusaders, 28-31, sa halftime.

Pagsugod sa 3rd quarter, nagsugod na sab ang kalbaryo sa Sharks dihang ningbulhot na’g sugod ang opensa sa Crusaders hangtod nga ningburot sa 72-45 ang ilang labaw sa nahabiling 4:50 minutos.

Wala na nakabangon ang Sharks gikan niadto.

Gumikan kay wala si McAloeny, ang Sharks nadominar sa Crusaders sa rebounding department.

Ang Crusaders adunay 53 ka rebounds kumpara sa 33 sa Sharks.

Ang Crusaders, nga ningkatkat sa 5-11 nga rekord, gipangulohan ni Marco Balagtas pinaagi sa iyang 26 puntos, nidugang og 15 puntos si Jerome Juanico samtang niamot og 12 puntos si Eric dela Cuesta.

Ang Sharks gipangulohan ni Joel Lee Yu pinaagi sa iyang 15 puntos. Bugtong si Yu lang ang nakahimo og dobleng numero nga puntos alang sa Sharks.

Grabe ka ngil-ad ang duwa sa Sharls nga hasta ang labing sinaligan niini nga si Patrick Cabahug igo ra nga nakamugfna og pito ka mga puntos.