Minglanilla Inter-Collegiate, Disyembre 7

Aron paghatag og kahigayonan sa hangyo sa ubang teams, ang mga nagpasiugda nakahukom sa paguswag sa opening day sa 1st Minglanilla Mayor’s Cup Inter-collegiate basketball championships ngadto sa Disyembre 7 sa Minglanilla Sports Complex.

Orihinal unta nga gikatakdang sugdan ang tournament karong Sabado, apan atol sa panagtigom nga gipahigayon sa niaging adlaw nasabutan ang pag-postponed niini tungod sa sayong mga committment sa ubang nga teams.

Nangulo sa pagtambong sa meeting si Minglanilla municipal administrator Concordio “Cording” Mejias, mga commissioners, coaches/team representatives.

Kompirmadong mosalmot sa torneyo nga may kinatibuk-ang ganting salapi nga P200,000 mao ang CESAFI champion University of the Visayas (UV) Green Lancers, University of San Jose Recoletos (USJ-R) Jaguars, University of Cebu (UC) Webmasters, University of Southern Philippines Foundation (USPF) Panthers ug Southwestern University-Phinma (SWU) Cobras.

Ang makampiyon sa usa ka semanang panagtigi makabulsa og P100,000 samtang P50,000 ang second placer. Ang third ug fourth placerS makadawat og P30,000 ug P20,000 cash.

“Atong plano nga himuon ta ni nga tinuig. This is not only for Minglanilla, but the entirety of Cebu’s collegiate basketball. Inig human gud sa Cesafi (Cebu Schools Athletic Foundation, Inc.), wala na man tay lega sa mga collegiate teams. Hopefully, sa sunod duna nay teams nga moapil,” matod ni Mejias./