54 NI HARDEN NASUGAKOD SA WIZARDS
Nasugakod sa host Washington Wizards ang kabangis nga gipakita sa pambato sa Houston Rockets nga si James Harden aron iposte ang overtime nga kadaugan, 135-131, kagahapon sa National Basketball Association (NBA).
Kon buot hunahunaon, dili lang si Harden ang nasugakod sa Wizards kon dili hasta ang laing pambatong shooting
guard sa Rockets nga si Eric Gordon.
Si Harden nagpakatap og iyang season-high nga 54 puntos samtang si Gordon nitampo og 36 puntos apan bisan pa niini, nakamaneho gihapon ang Wizards pag-angkon sa kadaugan.
Mismong ang Wizards nahibulong kon unsang hitabua nga natugotan nilang makapupo og hiniusang 90 puntos ang mga duha ka mga sinaligan sa Rockets unya nakuha gihapon nila ang kadaugan.
“No sir. Absolutely not. No sir. Not at all. It’s amazing we pulled it off still,” asoy sa usa sa mga pambato sa Wizards nga si Bradley Beal.
Ang Wizards, nga ningsaka sa 8-12 nga rekord, gipangulohan ni John Wall pinaagi sa iyang season-high 36 puntos, nidugang og 32 puntos si Beal samtang niamot og 22 puntos si Markieff Morris.
Ang Rockets, nga ningsukarap sa 9-10 nga baraha, nabiyaan og 133-126 sa nahabiling 1:50 minutos sa overtime.
Ning-aksyon paggukod ang Rockets apan nahikawan na sila sa oras.
Si Harden, kinsa adunay career-high nga 60 puntos, nakatigom na og 44 puntos pagkahuman sa 3rd quarter.
Apan sa 4th quarter, nasipyat si Harden og lima sa iyang pito ka mga itsa. Unya sa overtime, nakahimo og tulo ka
turnovers ang scoring leader
sa liga.
Ang Rockets ningkombati nga wala ang ilang sinaligang pointguard nga si Chris Paul sa ikaduhang sunodsunod nga higayon tungod kay aduna kini angol sa iyang tiil.
Sa laing gikaintapang duwa kagahapon, nagpakatap og iyang season-high nga 49 puntos si Kevin Durant aron agakon ang host Golden State Warriors sa kadaugan batok sa Orlando Magic, 116-110.
Gumikan kay wala gihapon nakaduwa sa Warriors ang duha sa ilang mga sinaligan nga sila si Stephen Curry ug Draymond Green, si Durant miagresibo og maayo hilabi na sa opensa.
Sulod sa 33 ka mga higayon nga nakaitsa og field goal si Durant sa kinatibuk-ang duwa apan 16 ra iyang napasulod.
“I still missed 17 shots. I tricked off a 50-piece. I felt like I had some shots that I wish I could have made last game and this game,” matod ni Durant. Si Klay Thompson miamot og 29 puntos alang sa Warriors.