3 PATAY; 2 SA MANDAUE, 1 SA TALISAY CITY

Tulo ang patay sa managlahing mga dapit sa Metro Cebu sukad niadtong Martes sa gabii, Nobiyembre 27, hangtod sa Miyerkules sa buntag, Nobiyembre 28.

Duha sa nangamatay gipamusil sa wa pa mailhing mga tawo sa dakbayan sa Mandaue samtang ang laing usa patay sa anti drug police operation sa dakbayan sa Talisay.

Unang nadawat sa kapulisan sa Mandaue City Police Office ang alarma sa pagpamusil alas 10 Martes sa gabii, sa sud sa buwangan sa Barangay Ibabao.

Ang biktima giila nga si Carlos Reyes o mas naila nga “Bading”, 42, taga sitio Macupa, sa brgy. Ibabao.

Matod ni Police Chief Inspector Aldrin Villacampa, hepe sa Centro Police Station, nga samtang nagtan-aw og sabong si Reyes, usa ka lalake nga nag-mask sa iyang baba nikablit niini ug sa pag-atubang, gipusil.

Naigo si Reyes sa agtang diin nigawas ang bala sa likud sa ulo hinungdan sa hinanali nga kamatayon.

Ang gunman uban ang laing usa ka lalake dali nga nigawas gikan sa buwangan dayon sakay sa usa ka motorsiklo nga gimaneho sa laing tawo.

Sa inisyal nga pakisusi sa kapulisan, si Reyes mamustaay na sa mga buwangan sa syudad.

Sa niaging semana, matud ni Villacampa, nakadispalko si Reyes sa laing buwangan sa syudad.

Usa ka oras sa wa pa gipusil, giingon nga aduna kini gikalalis sa gawas sa buwangan.

Usa sa gisusi sa kapulisan nga motibo sa kremin mao ang personal grudge.

Gitan-aw usab ang kalabot sa may kalambigitan sa illegal nga drugas.

Nasutang drug surrenderer si Reyes niadtong 2016 isip usa ka pusher.

“Amo gisusi ang about sa naa daw ni nadispalko sa laing buwangan and naa ni nakalalis usa ka oras sa wa pa kini pusila. Daghan daw naglagot ani niya kay kusog mamago, di mobayad if mapildi sa pinustaay,” asoy ni Villacampa sa Superbalita Cebu.

Nakuha sa crime scene ang usa ka empty shell sa .45 kalibre nga armas ug usa ka slug.

Human ang usa ka oras, laing kaso sa pagpamusil ang gitubag sa MCPO human gipusil ang usa ka 25 anyos nga si Kent William Isok, taga Hermag Village, Barangay Tabok, Mandaue City.

Matud ni Police Senior Insp. Rodgene Fudotan, hepe sa Basak Police Station nga gikan nikaon og noodles sa kilid sa dan si Isok sa eskina sa Tabok.

Nilakaw na kini palayo dihang niabot ang duha ka mga lalaking nagmotorsiklo, ang backrider nipusil kang Isok sa makadaghang’ higayon mga alas 4:50 sa kaadlawon.

Patay na kini nga nadangat sa tambalanan.

Susihon sa Basak Police Station ang mga CCTV camera sa mga establisemento nga nakapalibot sa crime scene kon aduna bay koyug ang biktima sa dihang’ gipusil kini.

Dugang ni Fudotan nga sakop sa usa ka fraternity si Isok.

Hinuon matud sa hepe nga wa silay nadawat nga mga reklamo kalabot sa frat war.

Usa sa gisunod karon sa kapulisan ang may labot sa ginadiling drugas o away sud sa ilang barkada.

“Amo ni gipangita ning ginganlan nga Isoy nga mao daw pirme koyug sa biktima kada kadlawon. Sige daw ni buyagon sa iyang papa. We are investigating also about sa naapil sa drug watch list ni siya,” butyag ni Fudotan sa Superbalita Cebu.

Samtang usa ka nursing student nga naila nga si Sheena Marie Consegra, 20, kinsa padung na unta sa iyang tunghaan, naigo sa bukton.

Dali nga gidala sa Mandaue City district hospital si Consegra, ug dali ra usab nga gibalhin sa usa ka pribadong tambalanan.

Nahitabo ang pagpamusil alas 4:50 kagahapon sa kaadlawon sa Corner Tabok.

‘MISUKOL’

Patay ang usa ka gikatahapang drug pusher human misukol sa kapulisan atol sa buy bust operation kagahapon sa kaadlawon sa Miyerkules sa Brgy. San Roque, Dakbayan sa Talisay.

Si Eugene Cabando, alias “Amaw” nagpuyo sa maong lugar, patay human giingong nisukol sa mga sakop sa Talisay Police ug Regional Mobile Force Batallion (RMFB-7).

Si Supt.Marlu Conag, hepe sa Talisay Police, nagkanayon nga nakabantay si Cabando nga mga pulis nipalit kaniyag shabu hinungdan nga nibunot sa iyang armas ug namusil.

Nahitabo ang pinusilay ug naigo sa nagkadaiyang bahin sa lawas si Cabando.

Ang kapulisan nakarekuber og .38 paltik nga revolver nga dunay tulo ka kabhang cylinder, laing nakuha ang 51 ka gagmay nga putos sa shabu.

Si Conag, midugang nga si Cabando notadong kriminal.

/ MGA EDITOR ■ PAHIBALO: Nabantayan sa Superbalita Cebu nga ang front page ning mantalaan ug sa Sunstar Cebu gigamit nga materyal sa black propaganda sa pulitika sud sa pipila na ka mga semana nga nakalabay, labina sa mga Dakbayan sa Mandaue ug Lapu-Lapu. Gipang-usab sa wa pa mailhing mga tawo ang nakapatik sa front page aron pagpanaut og mga opisyal samtang naghinangat ang eleksyon sa 2019. Wala kami labot ning mao nga mga pagpanaut kay wa kami gidapigan ni bisan kinsa isip gawasnong mantalaan ug organisasyon sa mga tigbalita. Midangop na kami sa mga hingtungdang ahensya aron pag-ila kinsa kining mao nga mga tawo alang sa paghimo og lakang, usa niini mao ang pagpasaka og kaso batok sa mao nga mga tawo o organisasyon nga naggamit ning mantalaan alang sa pagduso sa ilang dautan nga mga katuyoan.