Nawad-an na og igsuon sa landslide, posibleng trabaho na usab sa Apo Cement Corp.
Nawad-ad na sa iyang maguwang tungod sa landslide, posible nga mawagtangan usab sa iyang trabaho ang 51-anyos nga si Nestor Embalsado human sa hulga nga mahinayon ang temporaryo nga unom ka buwan nga lay-off sa mga kawani sa Apo Cement Corp. sa dakbayan sa Naga.
Kagahapon, nagprotesta ang gatusan ka mga kawani sa kompanya nga apektado sa maong layoff sa tubangan sa Department of Environment and Natural Resources (DENR) 7 ug sa Department of Labor and Employment.
Awhag nila hilabi na sa DENR nga ilibkas na ang suspensyon sa quarry kay mao kini ang rason nga gatusan ang mawad-an og trabaho.
Si Embalsado, kinsa 27 ka tuig na sa ACC, lakip nga niawhag sa duha ka ahensiya nga tabangan sila nga dili mawad-an og trabaho.
“Sa gidugayon (nako) sa Apo, first time gyud ning nahitabo tungod ining katalagman nga nahitabo. Sakit man pamalandungon pero nagpabilin kami nga lig-on sa pagtabang sa maong kompanya para makabangon hilabi na gyud sa trabahante sa Apo nga dili mawad-an og trabaho,” matod niini ning nahinabi sa Superbalita Cebu kagahapon.
Matod niya, wala sila gipasagdan sa Apo bisan pa human sa nahitabong landslide.
Si Embalsado lumolupyo sa Purok 2, Sindulan, diin nahitaboan ang landslide.
Matod ni Johnrel Goles, presidente sa Apo Cement Corp. Employees Union, 65 ka mga regular samtang ka- pin 300 ka contractual ang mawagtangan og trabaho sugod Disyembre 13.
Gusto nila nga ilibkas na sa DENR 7 ang suspensyon sa quarry aron dili mahinayon ang temporary layoff sa pili nga mga kawani.
Dugang ni Goles nga bisan og aduna’y notice to proceed na ang DENR sa Apo Land and Quarry Corp., nga sugdan ang hazard reduction plan apan gidid-an pa sila paggamit sa loss material sa yuta nga nag-unang materyal nga gigamit nila sa paghimo sa semento.
Matod niya, bisan ilang pagprotesta kagahapon ug pakig-estorya sa mga opisyal sa maong mga ahensiya apan wala pa’y kongkreto nga nahatag alang kanila.
Sa tuig 2017, ang Apo Land and Quarry Ventures mao ang aduna’y labing dako nga nabayad nga buhis sa local government unit (LGU) diin niabot kini sa P11 milyones.
Gisuwayan ning pamantalaan sa pagkuha sa habig sa ACC apan wa kini motubagsa text o sa tawag.