Presensiya sa militar
Daghan ang nasurprisa ug napugwat sa presensiya sa mga militar sa kadalanan nga maoy nagsilbing reinforcement sa mga sakop sa bag-ong natukod nga InterAgency Council for Traffic (I-ACT) sugod niadtong Huwebes, Nobiyembre 29. Sa I-ACT operations nga gilusad sa habagatang bahin sa probinsiya sa Sugbo, ubay-ubay nga mga motorsiklo ug traysikol ang gipang-impound tungod sa pagpataka og parking daplin sa national highway.
Duna say pipila ka mga awto nga gipang-towing ug labaw pang wala palabya sa pagdakop ang mga kolurom nga mga sakyanan, apil na usab ang wala marehistro ug kadtong mga kulang sa mga dokumento.
Tungod lagi kay walay abiso, daghan ang mga empleyado nga nagbagulbol kay naapil sa kahasol sa kinalit nga operation.
Pero ang punting sa ilang reklamo mao kon nganong gikinahanglan pa man nga adunay mga militar nga nagdala og mga tag-as nga armas atol sa operations nga nakapalisang ug nakapabalisa sa mga molupyo sa matag dapit.
Dunay punto kining maong reklamo kay lagi mga ordinaryong drayber ra man unta ang mga gipangsita atol sa operations.
Apan di nato kalikayan nga adunay mga aroganti, suberbiyo ug kuwang sa disiplina nga mga drayber nga yano nga mokomprontahi sa mga traffic enforcers, bisan og wala sa katarungan.
Dinhing dapita magamit ang presensiya sa militar ug dinhi madisiplina ang mga abusadong driver. So nganong mahadlok man ta kon dunay militar nga modisiplina sa mga badlungon nga motorista? Gawas lang siguro kon duna na silay buhaton mga pag-abuso.
Ang nakadeperensiya lang niining I-ACT kay wa mo-coordinate sa mga local government unit (LGU) mao nga hasta ang mga local of icials gikuyawan kon duna na bay militarization sa ilang tagsatagsa ka dapit. Kini maoy angay korehi-an.