Pahumot sa mga senador
Nagkalain-lain ang pahumot sa mga senador ug sa nanagan aron pagkabig sa loyaltad sa mga pumipili. Senate Resolution 915 gitinguha nila ni Senators Franklin Drilon, Leila de Lima, Antonio Trillanes, Francis Pangilinan, Riza Hontiveros ug Bam Aquino alang sa dinaliang inbestigasyon sa sunodsunod nga patay sa Sugbo. Nagpakaaron-ingnon kay pipila kanila naa sa talaan ni Pres. Rodrigo Duterte nga drug protector. Miintra sab si Sen. Grace Poe sa awhag nga inbestigahon in-aid of legislation apan tataw nga in-aid of election.
Juan Ponce Enrili miwara-wara sa pagbaliktad sa high tribunal court sa desisyon sa Sandiganbayan pagtugot nga makapiyansa og 1M pesos sa pagkalambigit sa 172.8M pesos sa iyang PDAF.
Jinggoy Estrada mibandilyo sa pagtuis sa Sandiganbayan sa unang hukom nga gitugotan na nga makapiyansa og 1.33M pesos sa pagkalambigit sa 183M pesos sa iyang PDAF.
Bong Revilla nagpalooylooy nga duha na ka higayon nga gisalikway sa Sandiganbayan ang iyang petisyon nga makapiyansa sa pagkalambigit sa 172.8M pesos sa iyang PDAF.
JV Ejercito sa iyang daghang nabuhat sa senado nunot sa pagsaway sa ubang kandidato nga na-isyo sa kurapsyon.
Imee Marcos nanawagan pagsuspenso sa VAT alang sa nag-unang palaliton nga bugas, isda, karne lakip na sa lana ug elektrisidad tubag sa taas nga inflation. Niya pa dili makausab sa Train Law ang presidente apan makahimo sa pagsuspenso sa VAT pinaagi sa pagluwat og executive order. Kay ang Train Law gitumong sa kaayohan diin ang excise tax nga gipahamtang gikwentada nga dili maalkansi apan gipahimuslan sa mga negosyante. Hustong binhi ug makina ihatag ngadto sa mga mag-uuma kay tua sa bukid ang sulbad sa kagutom. Financial assistance ug trabaho sa mga mag-uuma mintras nagpahiuli sa pananom ug pamuhi. Tumong nga libkason ang restrictions alang sa daling paggamit sa calamity funds sa naigo sa katalagman.
SAP Bong Go sa pagbutang og mga Malasakit Centers sa 22 ka lain-laing publikong tambalanan alang sa libreng serbisyong medikal nga natagamtam na sa liboan ka mga pasyenting kabos. Dugangan pa unya sa ubang ospital sa nasod nga ma-accredit sa Malasakit Centers.