James dili angay malmalon: Johnson

Nagtuo si Los Angeles Lakers executive Magic Johnson nga kinahanglan nilang bantayan nga dili masobrahan og kayod ang ilang pambatong si LeBron James aron dili maapektuhan ang ilang kampanya sa 2018-19 season sa National Basketball Association (NBA).

Gipasabot ni Johnson nga dili siya gustong mapareha ang trabaho ni James dihang nagduwa pa kini sa Cleveland Cavaliers diin nagpas-an kini og grabe ka bug-at nga obligasyon.

“We are trying to make sure that we watch his minutes but also that we don’t run everything through him because now it is Cleveland all over again and we don’t want that,” pasabot ni Johnson. “We want to get up and down.” Dili na bag-o alang kang James ang grabeng pagkayod apan mag-34 anyos na kini karong Disyembre ug tinguha sa Lakers nga dili malupig sa kahago ang four-time MVP hangtod mahuman ang upat ka mga tuig nga kontrata niini sa multi-titled squad.

“Basically minutes, trying to make sure we don’t overplay him and then also usage of the ball in his hands,” dugang ni Johnson.

“We got a lot of ballhandlers so we feel we won’t overuse him in terms of his ballhandling and also every play has to run through him.”

Kon opensa ang hisgutan, si James aduna na’y katimbang nga sila si Kyle Kuzma ug Brandon Ingram unya aduna sa’y kasaligan ang Lakers sa pagdala sa bola nga sila si Lonzo Ball ug Rajon Rondo.

“We don’t have to have LeBron having the ball in his hands all the time,” batbat ni Johnson.

Ang Lakers kasamtangang adunay 12-9 nga rekord.