Dakong financier sa drugs naa sa prisuhan sa Sugbo

Usa ka dakong drug personality nga piniriso sa usa sa mga bilanggoan sa Metro Cebu maoy financier nilang Michael Carabaña ug Jemuel Enrile, kadtong nadakpan sa buy-bust operation sa Guadalupe police station niadtong Biyernes sa gabii, Nobiyembre 30, nga nakuhaan og P41.8 milyones (dili P36.3-M sigon sa unang gikataho) nga balor sa shabu.

Ang maong drug personality nga bilanggo adunay koneksyon sa mga big time drug pusher sa kaulohan diin silang Enrile ug Carabaña mao ang hatdan sa supply nga mao na usab ang mo-repack niini aron ipang-apod-apud sa mga pusher sa Metro Cebu.

Matod ni Sr. Insp. Dexter Basirgo, hepe sa Guadalupe police station, nga dili lang usa nila nganlan kung kinsa kining bilanggo nga padayon sa iyang ilegal nga negosyo pinaagi sa pagpalihok sa kwarta.

“Known drug personality ni siya dili lang sa nato ma divulge kay ang mga connection ana diri sa down line basin ma sunog ang among plano. At least open ang atung follow up basin naa pa tay dako nga operation sa sunod,” matod ni Basirgo.

Ang pamaagi sa pag-deliver sa drugas giingong sugat-sugat diin gisulod kini sa bag ug didto bahinon sa giabangang boarding house o apartment.

Sa upat nga nadakpan silang Enrile ug Carabaña lang ang manag kaila samtang silang Arnold Arquiza ug Agustin Quijano maoy tig repack ug tig dispose sa mga pinakete sa ilegal nga drugas gikan ni Carabaña.

Samtang si Enrile usab ang sugoon sa dakong drug personality nga bilanggo kung kinsay hatagan sa drugas nga ilang gikuha gikan sa Luzon.

Adunay mga mahidungdanon nga impormasyon nga nakuha ang mga imbestigador sa cellular phone ni Carabaña ug Enrile nga gipaubos na karon sa forensic examination.

Kung makuha na ang unod sa ilang mga cellular phone isunod nila ang pag ila kinsa ang kontak sa dakong drug personality nga bilanggo didto sa kaulohon.

Gituohan nga human makalusot kadtong binilyon nga ilegal nga drugas sa Bureau of Customs sa nanglabay nga mga bulan, midagsa usab ang supply sa drugas sa Sugbo. ug sa mga silingang probinsya.

Si Sr. Supt. Royina Garmam direktor sa Cebu City POlice Office (CCPO), niawhag na usab sa publiko nga abagan sila sa pag-monitor ug itug-an kinsa kining mga drug player sa ilang dapit pinaagi sa pag text sa 'Itug-an ni CD hotline'. /