Backlog sa LTO driver's license mikunhod

Gikan sa 470,000 ka driver’s license nga backlog sa miaging mga administrasyon sa Land Transportation (LTO) 7, karon nius-os na kini ngadto sa 225,969 sa tuig 2018.

Kini human gihingusgan sa administrasyon ni LTO 7 Regional Director Victor Caindec kinsa nihulip sa katungdanan niadtong Enero tuig 2017 dihang gitudlo siya ni Presidente Rodrigo Duterte.

Si Caindec nagkanayon nga nahimong posibli ang pagkunhod sa backlog human iyang gipangitaan og paagi para mahimong plastic card ang papel nga driver’s licence sa mga motorista.

Gitumbok sa pangulo sa LTO 7 ang pagpanurok sa Temporary Offsite Printing Office (TOPO) ug nakahimo pa siya og mga mega licensing center sulod sa 10 ka buwan niyang paglingkod.

Kini sama sa SM Seaside City diin adunay duha ka TOPO, Robinson Galleria, Mactan Island Central Mall, Tagbilaran City ug Garcia-Hernandez sa Bohol diin ang maong mga TOPO ug Licensing Center pulos na operational.

Iyang gipadayag nga kaniadto atol sa panahon ni kanhi RD Arnel Tancinco ug Alita Pulga, ang gisaligan sa pag-imprinta mao lang ang mga district office ug dili makaato sa request hinungdan sa backlog.

Apan gumikan sa mga TOPO ug bag-ong licensing center, karon nag-average na og 45,000 ka plastic card ang ilang ma-imprinta gikan sa 25,000 matag buwan.

Si Caindec nipahibawo nga taliwa sa minilyon nga gigasto para sa TOPO ug Mega Licencing Center kansang kontrata adunay tulo ngadto sa lima ka tuig, ang LTO 7 walay gasto bisan piso tungod sa tabang ni kanhi Special Assistant to the President Bong Go.

Gawas niini, si Caindec niingon nga nakadaginot og P380,000 matag buwan sanglit wala na sila mag-abang og impounding area.