Militar motabang sa trapiko?
Nagbansiwag sa mga pamantalaan ang hula way sa mga sakop sa militar nga nitabang sa pagpatuman sa mga lagda ug balaod sa trapiko uban sa mga opisyal sa Inter-Agency Council for Traffic (I-Act).
Ang I-Act gilusad sa Department of Transportation (DOTr) aron pagsulbad sa suliran sa trapiko ug pagpatuman sa mga ladga sa karsada. Gilangkuban kini sa Land Transportation Office (LTO) ug Land Transportation Franchising ang Regulatory Board (LTFRB).
Gilakip usab ang Armed Forces of the Philippines (AFP). Mao kini ang ilang operasyon gisuportahan sa mga sakop sa militar. Apan wa ba diay gilakip ang mga kagamhanang lokal?
Ang mga opisyal sa trapiko sa siyudad sa Talisay ug lungsod sa Minglanilla niingon nga nasurprisa na lang sila sa dihang gipanakop sa I-Act ang pipila ka mga drayber ug gi-impound ang pipila ka mga tricycles niadtong Huwebes.
Si Rogelio Villaver, hepe sa City of Talisay Traffic Operation Development Authority (Cttoda), ug si Francis Sanguenza, Minglanilla Traffic Command (Mitcom) operations head, niingon nga gi-welcome nila ang operasyon sa I-Act sa ilang mga dapit apan kuwang lang sa koordinasyon.
Kadtong tag-iya sa mga sakyanan nga na-impound kinahanglan pa nga mokuha og letter of consideration sa tagsa-tagsa ka mga mayor aron ma-release sa LTO 7.
Si Sanguenza niingon nga nisuportar siya sa paggamit sa I-Act sa mga sundawo sa maong traffic operations. “Nindot yud nga naay sundalo nga present sa operations just for security precaution. Naa bayay ubang violators nga musukol og enforcers, especially if dako ang multa,” matod pa niya.
Si Cebu City Councilor Dave Tumulak, public order and safety committee chairman, niingon nga ang kagamhanan sa siyudad andam nga makig-alayon sa I-Act bisan pag way taga City Hall nga nitambong sa paglusad niini niadtong Nobiyembre 28.
Si Tumulak mipapasaka sa resolusyon sa konseho sa siyudad nga naghan yo sa AFP sa pag-deploy og mga sundawo sa major roads sa siyudad.