Si Ninong Joel sa aseras

Nagsubay ko sa aseras sa dalan P. Lopez sa downtown area sa dakbayan sa Sugbo ug akong naagian kining usa ka bata nga naghaguk sa daplin. Sa iyang tungod may paninda nga giasikaso sa usa ka hamtong nga tindero. Nihunong ko sa makadiyot og nagpatimpla og kape. Taudtaod nisinggit ang tindero ngadto sa bata aron mobangon. Nitimbakuwas ang bata ug dayong sul-ob sa iyang uniporme.

Akong nasayran nag-eskwela ang bata sa City Central isip tinun-an sa Grade 3. Siya si Jude Louie Hernal, 9 anyos. Ang tindero nga iyang ninong mao si Joel Molleno taga Banawa, Cebu City. Matod ni Joel, 3 anyos pa lang si Jude gibilin na kini sa iyang inahan kaniya diha sa aseras diin siya naninda. Sa sinugdanan, kuhaon pa ni sa inahan hangtod nga panagsa nalang kini mohapit sa iyang tindahan.

Si Joel nga nahibalo sa iyang responsibilidad isip ninong way nahimo gawas sa pagbarug isip amahan ug inahan sa iyang kinugos. Wa man sab hinuon siyay kabilinggan kay wa man sab siya magminyo. Paglabay sa katuigan, nidako si Jude og iya kining gipaeskwela.

Gikan sa eskwela sa aseras, mopauli si Jude og motabang sa pagpaninda. Pagka gabii adto sila pauli sa Sambag 1. Sayo sa buntag balik sa ilang paninda sa aseras. Sa aseras na si Jude motiwas sa pagka tulog.

Niingon si Joel tinguha niya nga hatagan si Jude og maayong ugma. Hinuon mag-agad kini sa dagan sa iyang paninda diha sa aseras. Di man mahibaw-an ang panahon basin may demolition nga mahitabo.

Matod ni Jude dako ang iyang pasalamat sa iyang ninong nga nisalbar kaniya gikan sa kaalautan.

Iyang giila ang grabing sakripisyo sa iyang ninong nga di kabayran og sapi. Unyag molampos siya sa pag-eskwela gusto niya nga mag-alagad sa Ginuo isip usa ka pastor.

Nalipay si Joel sa mga plano sa bata bisan sayod siya nga subidahon kaayo kon basihan ang iyang panginabuhi.

Pero sayod tang tanan nga di lang pastor ang napahuman sa mga tawo nga nanginabuhi sa aseras. Dunay nahimong pari, doktor, engineer, nurse og daghan pa. Samot na kon may mga malumong kasingkasing nga moayuda aron makab-ot ang pangandoy ni Jude.

Sa iyang bahin, si Ninong Joel nanghinaut sab nga di lang matandog ang iyang paninda nga maoy gisaligan alang sa ilang panaw ni Jude.

Ang sugilanon sa kinabuhi ni Jude ug sa iyang ninong Joel magsilbi unta nga pagtulun-an alang sa uban.

Sa mga ninong ug ninang nga wa pa kasuway og ingon niini nga sitwasyon ang siguro sab mong magsusi susi kon naunsa na ang inyong mga kinugos. Nagpadayon ba sila sa pag-eskwela o nahuman na ba. Baskog pa ba ang panglawas o nagmasakiton na? Di ba ang sulti sa pari nga kitang mga ninong ug ninang may responsibilidad sa pagpadako sa atong mga kinugos.

We have to balance the interest of the riding public obviously and also ensure the financial viability of our public transport sector.”

- Land Transportation Franchising and Regulatory Board (LTFRB) Chairman Martin Delgra III