Laagan nga asawa

Dear Papa Joe,

Tawga lang kog Philip, usa ka minyo ug dunay duha ka anak. Ang akong problema mao ang akong asawa nga nakabarkada sa iyang officemate nga dili maayo og dungog. Na tsismis sa ilang office nga kabit sa iyang amiga ang ilang boss ug laagan pa gyud kaayo ni sila, iyang dalaon permi akong asawa ug mag nightout sila.

Nisamot pa gyud ko kalagot kay akong nahibaw-an nga mopatol gyud ning iyang amiga og mga lalake labinag kwartahan. Manghantokay diay ang iyang amiga. Kadaghan na ko sigeg badlong sa akong asawa nga dili na makig-suod ug dili na magkuyog-kuyog sa iyang officemate labina gyud og dunay mga party nga ilang tambongan. Pero igo lang mi mag-away sa akong asawa kay matod pa niya wala man siya gibuhat nga dautan ug wala pod kuno siya kabantay nga nanglaki ang iyang amiga. Matod pa sa akong asawa nga nag unwind lang sila.

Unsa kahay akong buhaton? Gipahunat nako akong asawa nga mo resign na lang sa iyang trabaho pero gitubag man ko niyang makaya ba nako ang mga gastuhon sa balay nga mas dako pa raba siyag sweldo nako. Palihug tambagi ko

PHILIP

Dear Philip,

Base sa imong giingon, puros tsismis ra man kaha nang bating dungog sa officemate sa imong asawa. Way dautan kon magkuyogkuyog sila basta dili lang dis-oras. Pasabta lang nang asawa nimo nga dili man maayong paminawon nga maglaagan siyag gabii kay dili na siya single.

Usa na siya ka minyo mao nga ang angay niyang buhaton nga mo focus siya sa iyang mga anak. Kon dili siya patuo, angay nga ipatigbabaw nimo imong pagka bana. Basin og magpaubos lang pod ka kay mas dako siyag sweldo. Lisod ra ba kaayo ron ang panahon kon usa ra ang mangitag kwarta pero mas lisod kon maguba ang inyong pagpuyo. Pag-ampo mo sa Ginuo.

Papa Joe