Your smile, your love
Mora kog mamatay sa akong nakita. Morag mobuto ang akong dughan sa kaguol.
“Mao nang bayhana ang giingon ko nimo, Te Grace.”
Morag di ko makatingog ug makalihok. Guwapa ang maong babaye. Batan-on sab. Malipayon sila si Ronnel nga nagtapad paglingkod sa terrace.
Wa na ko makagwanta sa akong gibating frustration. Nagdali kong mibiya sa among terrace ug milargo kog sulod akong kuwarto. Mihilak ko pag-ayo.
Di gyud diay angay nga maglaom ko sa gugma ni Ronnel. Namahid ko sa akong mga luha sa akong tudlo samtang naglingkod ko sa ngilit sa kama. Miginhawa kog sagunson aron paghawan sa kahuot sa akong dughan. Angay ko nang hunungon ang akong hilom nga pagmahal kang Ronnel. Imposible na kining mahitabo karon. Dako ang akong pagtuo nga girlfriend ni Ronnel ang kauban niyang babaye sa ilang balay.
Dugay-dugay gyud nga nawala ang gibati kong kaguol. Midaot man gani ang akong lawas tungod kay nawad-an kog gana sa pagkaon. Dugay sab kong makatulog panahon sa kagabhion. Usahay mokalit lang kog hilak sa sulod sa akong kuwarto. Nagpasalamat ko kang Nymfa nga kanunay siyang nagdasig ug nag-alam-alam nako.
“Ayaw pada’ sa imong kaguol, Te Grace. Naa pay daghang laki. This is not the end of the world for you.”
Laing mga adlaw ang miabot. Inanay kong nadawat ang nahitabo sa akong gugma kang Ronnel. Inanay kong naka-move on.
Usa ka gabii nga nagtan-aw ko sa gisunod kong teleserye sa telebisyon sa among sala, nag-inusara lang ko sa sala, dunay nanuktok sa pultahan. Didto sa kosina ang among katabang, nanghipos sa among gikan-an. Ako ang nag-abli sa pultahan. Mikusog pagkuba ang akong dughan ug nakahangos ko sa kalipay. Si Ronnel ang nahiabot. Gipasulod ko siya sa sala. Nag-atbang mig lingkod. Seryuso kaayo siya.
“Di na ko kaagwanta sa akong love nimo, Grace. It’s about time nga daygan tika ani. Yes, Grace. I love you so much.”
Ug gikan kang Ronnel , nahibaw-an nako nga ang kauban diay niyang babaye sa ilang balay anak sa iyang Papa sa pagka ulitawo pa ani. Half-sister diay niya kini
Gisugot ko si Ronnel. Ako na tingali ang labing malipayong babaye sa tibuok kalibotan niadtong tungora.