National team members nanghawod sa NAGT sa Naga
Gipakita nila ni Nikko Huelgas ug Ma. Claire Adorna kon nganong nasulod sa national team pinaagi sa pag-angkon sa kadaugan sa ilang tagsatagsa ka kategoriya sa 2nd leg sa 2018 National Age Group Triathlon (NAGT) sa City of Naga Boardwalk kagahapon.
Si Huelgas, kinsa back-toback Southeast Asian (Sea) Games gold medalist, naghari sa men’s elite division pinaagi sa paghuman sa 1.5-kilometer swim, 40K bike ug 10K run nga lumba sulod sa duha ka mga oras, duha ka mga minutos ug upat ka mga segundos.
Nag-una si Huelgas og hapit tulo ka mga minutos sa nagsunod kaniya nga sila si Andrew Kim Remolino sa Talisay Luigi Triathlon Group (TLTG)/Go For Gold ug Jorry Ycong of Rider Omega Tri Team nga mao ang miangkon sa ikaduha ug ikatulong dapit.
Nagkanayon si Huelgas nga ang iyang pagsalmot sa lumba tipik sa iyang taas nga preparasyon alang sa 2019.
“It’s a long term program and we’ve been preparing for the past years. Whatever races comes during the span is part of our preparation. The NAGT is a good annual race and I would definitely recommend this to my teammates in the national team,” matod ni Huelgas sa interbyu sa Sun.Star Cebu.
Si Adorna, kinsa 2015 Sea Games gold medalist, mao sab nipatigbabaw sa women’s elite pinaagi sa oras nga 2:29:31.
Nagsunod sila si Rue Reinhardt Panibon sa Organique (2:35:38) ug Cianyl Jamae Gonzalez sa Rider Omega (2:40:09).
Ang lumba, nga giorganisar sa TSE Live Inc. ug sanctioned sa Triathlon Association of the Philippines (Trap), nagdalit og P15,000, P10,000 ug P5,000 sa top 3 winners.