GRAB DRIVER GITIPI
Ang lalake nga napalgang patay na nga gilabay sa Barangay Langub, lungsod sa Asturias, lalawigan Sugbo niadtong Nobiyembre 13 sa hapon ning tuiga, nailhan na sa iyang pamilya niadtong Sabado, Disyembre 1.
Nagpailang asawa nga si Marites Alegado, 45, taga Barangay Poblacion Sibonga maoy niila sa biktima nga si Jiboy Delos Reyes, 41, nga nakaangkon og grabeng samad sa ulo ug kadaot sa nawong niini.
Matod ni Alegado, si Delos Reyes usa ka drayber sa Grab Car, usa ka transportation network vehicle service (TNVS) company, nga na-missing sukad niadtong Nobiyembre 13.
Si Chief Insp. Roger Quijano, hepe sa Asturias police station, nagkanayon nga usa ka mag-uuma ang nitawag kanila niadtong Nobiyembre 13, pasado alas 4:00 sa hapon nga adunay lalake nga wala nay kinabuhi nga gilabay sa kalibutanan sa Langub.
Tungod niini, gipahibawo dayon nila sa munisipyo ang insidente aron magpatabang nga mailhan ang maong lalake apan, walay bisan usa ka residente sa tubuok lungsod ang miila niini.
Pipila ka adlaw ang nakalabay, gipalubong na lang kini sa publikong lubnganan sa lungsod.
“Permiro ani walay nakaila niya sa lungsod mao tong nagpatabang mi sa PIO sa munisipyo pero wala man gyuy nakaila, among duda ani gi pusposan ni or naay hard object nga koan ba sa iyang ulo,” matod ni Quijano.
Sa miaging semana, si Alegado nagpatabang sa Cebu City Police Office (CCPO) aron mapangita iyang bana nga nagmaneho sa itom nga Nissan Almera nga adunay
plate number OY 2428 nga sakop sa Grab Car.
Dali nga gi-flash alarm sa Mobile Patrol Group (MPG) sa tanang unit sa kapulisan sa siyudad aron mapahibawo nga gipangita kini sa iyang kabanay.
Apan niadtong Sabado, 1 adunay nipahibawo kang Alegado nga dunay lalake nga napalgang patay sa Asturias ug dali dayon kining milarga padulong sa maong lungsod.
Sa pagkakita sa picture niini, positibo siya nga ang napalgang patay mao ang iyang bana nga si Delos Reyes.
Tungod sa pag-ila kabanay sa lawas sa biktima, ang lubong gipaugkat sa kapulisan ug gidala kini sa ilang panimay sa Barangay Poblacion sa lungsod sa Sibonga.
Matod sa asawa nga human nga dili na nila makontak ang telepono niini, nagkadiindiin na sila sa pagpangita sa iyang bana.
“November 13, sir, na missing na siya pero pag November 12 alas 4 sa hapon nakontak pa nako pero pagka Nov. 13 dili na makontak gyud,” matod ni Alegado.
Iyang gitug-an nga matag adlaw kung momaneho kini sa Grad ug dili kini mo sipyat sa pagtawag kaniya ug sa iyang duha ka mga anak nga nagpangidaron og 17 ug 15 anyos nga pulos mga babaye.
Ang mga imbestigador sa Asturias police station makigalayon karon sa kompanya sa Grab aron masubay kung kinsa ang katapusan nga pasahero.
Dili pa makatumbok si Quijano kung tulis ba ang motibo sa krimen o adunay laing angulo sa iyang kamatayon.
Padayon pa usab nga gipangita ang sakyanan nga gi maneho sa biktima nga gipanag-iya ni Constantino Cuyos nga taga Poblacion, lungsod sa Sibonga. /