CHRISTMAS PARTY DILI PRAYORIDAD: JOY TUMULAK
Nihangyo ang traffic coordination office sa Kapitolyo ngadto sa traffic groups sa Metro Cebu nga ilangay una ang ilang pagpahigayon og Christmas parties.
Kini aron makatutok sa pagdumala sa trapiko ang ilang mga enforcer samtang naghinangat ang Pasko, diin gipaabot ang paghuot sa dagan sa trapiko sa Metro Cebu.
Matod sa focal person on traffic management sa Kapitolyo nga si Joy Tumulak, angayang dili na masubli pa ang nahitabo niadtong Disyembre 23 sa miaging tuig diin nilanat og 6 ka oras ang trapik paingon sa habagatang ug amihanan sa Sugbo.
Lakip sa gitan-aw nga rason sa maong hitabo mao ang kakuwang sa mga traffic enforcer diha sa kadalanan.
Dugang niya, maayong inig liwas nalang sa Pasko ipahigayon sa mga traffic group ang ilang mga party aron moluranglurang na usab ang masinati nga trapiko sa kadalanan.
“Ug mahimo, i-delay lang una ang celebration sa Christmas party or i-advance ang Christmas party, basta ibawal lang ang pag-celebrate ug Christmas party gikan sa pagka-petsa 21 (December 21) hangtud na gyud inig dayong Pasko. Itutok lang ang tanan (enforcer) sa kadalanan unya liwas na lang ta sa Pasko mag-celebrate,” niingon si Tumulak.
Sigun ni Tumulak nga sa dili pa ang tingsakay ug bakasyon alang sa holiday season, mopatawag siya og coordination meeting tali sa traffic managers ug mga chief of police aron mapangandaman ang traffic sa holidays.