Pagpasaka sa pletihan

Managlahi ang baruganan sa mga lider sa transportation group dinhi sa Sugbo kalabot niining sunodsunod nga pag-us-os sa presyo sa lana. Ang Cebu Provincial Bus and Mini Bus Operators Transport Cooperative (CPBMTC) nga pinangulohan ni Julieto Flores, nakahukom nga dili na lang nila ipadayon kadtong ilang tinguha nga mapausbawan ang plitehan.

Si Flores mao usab ang presidente sa Cebu South Mini Bus Operatiors Association (CSMBOA) ug spokesperson sa Cebu Provincial Bus Operators Association (CPBOA).

Ug alang sa kaangayan sa riding public, ilang i-withdraw ang petisyon nga ilang gipasaka sa Land Transportation Franchising and Regulatory Board (LTFRB) nga magpataas unta sa ilang pletihan. At least, matawag nga nagpakabana usab sila og kaangayan sa publiko.

Pero, lahi usab ang panglantaw niining laing transportation group nga nagbasehan sa dakbayan sa Lapu-Lapu. Si Romeo Armamento sa Basak Lapu-Lapu City Jeepney Operators and Drivers Association (BALACJODA) mipasabot nga ang presyo sa bugas ug basic commodities wala mo-us-os ug angay lang nga mopasaka sila sa pletihan.

“Ang kana bayang pagsaka sa presyo sa palaliton resulta baya na sa pagsaka sa presyo sa fuel niadtong nangaging buwan. Gi-capitalize man gud sa mga negosyante. Ultimo gani kamunggay pwerte nang mahala,” matod ni Armamento.

Dunay punto si Armamento sa iyang argumento, kay tinuod man sab gyud nga duna say mga negusyante nga mipahimulos sa kahigayonan.

Pero ang pagpataas sa pletihan samtang nagkaubos ang presyo sa lana, salikwaot kaayo paminawon kay susama ra og gisamutan natog duot ang yanong konsumedor.

Nganong di man ipunting sa grupo ni Armamento ang pagawhag sa local government sa hugot nga pagmonitor sa mga presyo sa palaliton?