Street children

Ang Department of Social Welfare and Development (DSWD) miawhag sa publiko nga dili mohatag og pinaskuhan nianang mga batang libud-suroy nga nagpakilimos diha sa kadalanan ug kanang mga manaygon sud sa mga pampublikong sakyanan. Matod pa sa DSWD nga kon mohatag god ang katawhan, mag-anad ang maong mga bata ug dili na mohunong sa ilang pagpakilimos sa kadalanan.

Gi-awhag usab sa DSWD ang publiko nga i-report ngadto kanila kabahin sa presensiya aning maong mga bata. Sus, nganong magsalig pa man sila sa publiko kabahin sa presensiya niining mga bata? Unsa man sila, mga buta? Nganong dili man sila manggawas sa ilang buhatan ug mosuroy sa mga kadalanan aron ilang makita kining maong nga street children nga nagligdas lang sa aseras.

Naa diha sa mga skywalks sa may Fuente Osmena daghan mangatulog. Bisan sa Gen. Maxilom Avenue extention corner M.J Cuenco duol ra sa regional office sa DSWD naay daghan diha. Dili na lang unta sila magsalig sa publiko nga motaho kanila.

Kining maong problema dili lang dinhi sa Sugbo kon dili sa ubang mga urban areas o mga dagkong siyudad sa tibuok nasud. Kini gumikan gihapon sa kawad-an. Ang mga ginikanan dili na makabuhi kanila og dili makahatag og maayong kaugmaon sa ilang mga kabataan. Sila pa gani mismo maoy matukmod aning maong mga bata nga anha manginabuhi sa kadalanan.

Ang amahan palahubog samtang ang inahan sugarol. Tuod adunay mga drop-in center sama diha sa Parian nga andam mosagop ning mga bataa. Apan manglayas man sab kay naanad na lagi sila nga diha manginabuhi sa kadalanan. Kon dili mahaw-as kining mga bata sa ilang situwasyon karon, unsa man kahay ilang kaugmaon?

Posible nga mahimo kini silang kriminal inig kadako nila. Gani sa pagkakaron daghan namang mga binoang ang ilang nakat-unan. Manguot ug mangawat naman gani sila karon. Posible man gani nga kining maong mga bata maoy gigamit sa sindako sa illegal nga drugas kay wala may criminal liability ang mga menor de edad kon madakpan. Inutil ang gobiyerno ning maong problema sa atong katilingban.