Unsay gidugayan sa pulis?

Maut. Ang mora og lima lang ka metros ang gilapdon nga tulay diha sa Compostela, Cebu duol sa usa ka establisamento nakompleto na gyud human sa dul-an usa ka tuig nga pagtrabaho. Gani, tungod sa kalangay sa trabaho kinuyogan sa grabe nga abog nasuko ang tag-iya sa establisamento ug iyang gipaskinan kini og masakit nga mga pung. Wa hinuon magdugay ang gitarok nga tarpaulin duol sa gitrabaho nga tulay.

Apan naay dakong apan gihapon ang trabaho sa tulay (concrete bridge) bisan og nahuman na. Ang mga motorista nakadiskita ug mireklamo nga ang approach kon sumpay sa dalan ug tulay wa gisemento o gipatag man lang. Imbis nga mopabulhot ang drayber sa sakyanan kay sementado na ang tulay mopreno na hinuon tungod sa bati nga approach.

Sa makadaghan nakong biyahe sa nagkalainlain nga dapit dinhi sa probinsya sa Sugbo akong nakita ang trabaho sa atong highway nga walay katapusan labina og magkaduol na ang piliay. Gani, ang mga dalan nga maayo pa ang espalto giguba kay aron sementohon. Only in the Philippines.

Ang pagsemento sa highway maayo nga kalamboan alang kanatong tanan kay hapsay na ang pagbiyahe. Pero, matud pa sa mga eksperto, ang trabaho sa atong kadalanan matawag nga “below par” sa international standards.

Kon sa ato pa nga panultion bati gihapon kay naay parte sa dalan nga mouksoy ang dagan sa sakyanan kay dili patag.

Naay mga bahin sa dalan nga gibiyaan sa kontraktor nga wala gitapos ang pagsemento o espalto. Mga kahoy ug poste sa kuryente nga anaa pa gihapon sa kilid sa dalan nga gipalapdan na nga usa sa mga hinungdan sa baga nga trapiko.

Ato ba nga sabton nga ang kontraktor sa mga proyekto sa dalan ubos sa Department of Public Works and Highways (DPWH) gipasagdaan lang? Usa sa mga programa ni Presidente Duterte mao ang pagpapha sa kurapsyon sa atong kagamhanan.

Di pa uwahi sa mga opisyales sa DPWH nga striktohon og patuman ang lagda sa mga proyekto.

Gi-inspeksyon ba kaha og pirmi sa taga DPWH ang mga proyekto sa kadalanan dinhi sa Sugbo? Kon ang di maayo nga resulta sa trabaho sa kadalanan maoy atong basihan makaingon ta nga gipasagdaan lang ang mga kontraktor. Di hinuon tanan bati ang pagkatrabaho sa dalan.

○ ○ ○

SULOD. Kon tinuod ang gitaho kagahapon nga ang bigtime financier sa shabu naa pa sa sulod sa usa sa mga prisohan dinhi sa Metro Cebu, unsa may gidugayan sa atong kapulisan? Nganong wa pa ning tawhana gipasakaan og lain nga kaso? Matud pa, kining giingon nga drug lord ang naghatag og puhonan sa nasikop nga shabu balor og P41.8 milyunes niadtong Nov. 30.