Taas og maintenance

Dear Noy Kulas,

Di diay maayong pasumban ang kasingkasing kay dunay mga panahon nga mao ra ni ang imong mahayan. Maayo diay nga maminaw usab ta sa estorya sa atoang pamilya ug mga higala.

Nakaingon ko ani kay karon ra ko naka realize nga sakto ang akong friend ug akong family. Kini man gud ang akong asawa, sa uyab pa mi, nagsige na og warn ang akong friends kay lagi social climber, gusto pirmeng naa siya sa usa ka butang. Kon sakyanan pa ni siya, taas og maintenance.

Wa ko maminaw sa ilang mga estorya kay love lagi nako. Nagtuo sab ko baya nga kon maminyo mi, mausab na siya, labina kon duna na mi anak. Karon, duha na ang among anak, pero ang iyang pagka social climber wa mawagtang.

Naputos na siya sa utang ug ang nakapait, ako ang paninglan sa uban nga iyang giutangan. Natural kay bana lagi, bayad sa way kusmod. Mao ni ang ugat sa among mga away kay naa mi duha ka mga anak nga puro nag-eskwela sa private school ug mahal ang bayad. Masuko na man hinuon siya kay ngano kunong initan nako ang iyang hilig.Maayo gani mao ra na ang iyang bisyo.

Okay ra kuno siya og magbuwag mi kon di na kuno ko ganahan niya. Naglibog na ko unsay akong buhaton. Lami na tuod biyaan ning akong asawa pero maluoy man pud ko sa akong mga anak.

Unsa man kahay akong buhaton aron mausab ni siya? Please tambagi ko.

PAUL Paul,

Di sa tanang higayon nga imong panubagon ang responsibilidad sa imong asawa, labina kon kini makadaut ug makaguba sa pamilya, labina sa finances. Adtoa nang naandan nga mga utanganan sa imong asawa. Ingna sila nga di ka na mobayad kon mangutang ang imong asawa kay prayoridad mo ang inyong mga anak nga mas nanginahanglan og support nimo kay kaniya nga puro ra kapritso sa kinabuhi ang gihuna-huna.

Buhata ni bahalag masuko ang imong asawa. Kon ireklamo man siya sa barangay o sa bisan asa nga buhatan, pasagdahi. Kay karon gud, mao nang wa siyay kurat sa pagpangutang kay naa man kang pirme mosagang.

Unya estoryahe ang iyang pamilya aron di na sila mahibulong kon nganong naingon ana ka. Di ka nila mahayan. Ug hayan makamaymay pa sila sa imong asawa. Sila ra ang makapanton, kana kon gusto nila nga matunhay ang inyong pagpuyo.

Karon, ayaw na siya suportahi pa sa iyang kapritso aron di mosamot og gara. Makakaon ran a siyag tagam kon duna nay mokiha niya.

NOY KULAS