Without you, life is nothing
Gisulingahan ko si Ador. Maglagot gyud ko aning tawhana. Di man gud ko gusto nga tan-awon pag-ayo sa usa ka lalaki. Labi na kon ang tinan-awan morag dunay dalang laing kahulogan. Nagdali kong mibiya sa akong nahimutangan sa beach resort dihang miduol siya nako.
Nagkusmod ug nagyawyaw ko samtang miduol kanila ni Yenyen ug Rowena, ang labi kong suod nga barkada. Niadto gung adlawa, Sunday, nagkasabot ming tulo nga mangaligo sa Marigondon Beach Resort. Parehas mi nga taga Cordova.
“O, unsa gud nang imong hitsura, Ruby, ng di man madrowing?”
“Na, ikaw man gud, Yen, gipakuyog mo pa gyud si Ador nga kontra man kaayo na ni Ruby?”
Nakamatikod sila si Yenyen ug Rowena nga naglagot ko. Miyaka ko sa baybayon. Wa ko tubaga ang duha ko ka amiga. Ambot ba sab ni si Yenyen, uy, nga pakuyugon man gyud niya si Ador kon duna mi mga lakaw? Hilom kong nakaingon.
Silingan ni Yenyen si Ador. Unsaon man sab gud kuno nga mokuyog man si Ador? Mao ni ang gipasabot ni Yenyen nako. Di kuno siya gusto nga mahiubos kaniya si Ador kay childhood friend kuno sila.
Mitapad pagyaka si Yenyen nako.
“Pasagdi lang gud na si Ador, Ruby. Unsaon man gud, dako man kaayo nag gusto nimo.”
“Ha?” Puwerte nakong kuganga. “Nganong karon ka man lang nagsulti nako ana, Yen? Ingna siya nga wa gyud siyay chance nako. ug kon pakuyugon mo siya pag-usab nato kon duna tay lakaw, di na ko makigbarkada nimo.”
Nataas gyud ang akong tingog. Mitindog ko. Nagdali kong misulod sa giabangan namong open cottage. Gikuha ko ang akong ilisan ug nag-ilis ko sa dressing room. Wa na ko mananghid kanila ni Yenyen ug Rowena, milargo kog pauli. Misamot ang akong kalagot kang Ador. Nain-love siya nako? Nangyamiid ko naghunahuna ani.
Di siya angayan nako. Oo, guwapo siya apan anak lang siyag ordinaryong mga ginikanan. Clerk lang sa gitrabahoang opisina ang iyang amahan, ug sidewalk vendor ang iyang inahan sa among lugar sa Cordova, namaligyag sigarilyo ug sitsirya. Samtang ako, anak ug datong mga ginikanan kay pulos mga negosyante sila si Mama ug Papa.
Di mahitabong mahigugma ko kang Ador. (SUMPAYAN)