WADE MIASWAT SA MIAMI HEAT
Jordan, Dallas mitipi sa Clippers; Lakers, Spurs, 76ers midaog sab
Kalmadong gipasulod sa beteranong si Dywane Wade ang iyang duha ka freethrows sa nahabiling 3.2 segundos aron agakon ang host Miami Heat sa kadaugan batok sa Utah Jazz, 102-100, kagahapon sa National Basketball Association (NBA).
Sa katapusang posisyon sa bola sa Heat, si Wade nakalusot sa depensa sa batan-ong pambato sa Jazz nga si Donovan Mitchell unya nakahagpat siya og foul gikan kang Rudy Gobert sa iyang pagsuway og itsa nga maoy naghatod kaniya sa freethrow line.
Human napasulod ni Wade ang iyang duha ka freethrows, nakaitsa pa sa three-point land si Mitchell apan nasipyat.
Dili sayon ang naagian sa Heat una nila naangkon ang kadaugan gumikan kay kinahanglan pa nilang mobangon gikan sa 19 puntos nga pagkalubong sa sayong bahin.
Ang duha ka mga kampo sulod sa 17 ka mga higayon nga nagpulipuli sa paggunit sa labaw unya adunay 16 ka mga higayon nga nagtabla ang duwa.
Ang Heat, nga mingsaka sa 9-13 nga rekord, gipangulohan ni Hassan Whiteside pinaagi sa iyang 23 puntos ug 20 rebounds, nidugang og 16 puntos matag usa sila si Josh Richardson ug Kelly Olynyk samtang nitampo og 15 puntos si Wade.
Si Heat coach Erik Spoelstra igo ra nga naghuwat kon motawag ba og timeout si Wade sa katapusang posisyon nila sa bola, tataw lang nga dako siya og pagsalig sa iyang labing beteranong sinaligan.
Wala motawag og timeout si Wade ug dihang nakakita kini’g gamayng buslot sa depensa sa Jazz, wala kini magmakuli sa paglusot.
“It’s like putting on an old glove,” asoy ni Spoelstra. “We’ve been in that situation so many times before. It was very natural for him to read everything.”
Ang Jazz, nga nahagbong sa 11-13 nga rekord, gipangulohan ni Ricky Rubio pinaagi sa iyang 23 puntos, nihatag og 19 puntos si Jae Crowder samtang niamot og 18 puntos si Mitchell.
Sayong misayaw ang opensa sa Jazz ug nakaposte dayon kini og 35-16 nga labaw sa nahabiling 1:46 minutos pa lang sa 1st quarter.
Apan human niini, kalit lang ningbahar ang duwa sa
Jazz nga naghatag og kahigayunan sa Heat nga makamugna og 20-0 nga rally aron ilugon ang labaw, 36-35, sa nahabiling 7:27 minutos sa 2nd quarter.
Human niini, puwerte na ka sikit ang kombati hangtod na sa katapusang gutlo.
“We’ll clean it up. It’s little things,” matod ni Utah coach Quin Snyder. “Overall, I’m happy with how we competed, but
obviously we wish we could do things better for a full game.”
Sa laing mga duwa, ningdaog ang Los Angeles Lakers batok sa Phoenix Suns, 12096, New Orleans Pelicans batok Charlotte Hornets, 119109, Philadelphia 76ers batok Memphis Grizzlies, 103-95, Dallas Mavericks batok LA Clippers, 114-110, ug San Antonio Spurs batok Portland Trail Blazers, 131-118.