FUEL SUBSIDY DI NA MAKUHA HUMAN SA GILATID NGA TAGAL

Maglisod na og dawat sa fuel subsidy sa kagamhanan ang operators ug drayber sa mga public utility jeepney

(PUJ) kon mapakyas sa pagkuha sa gihatag nga tagal sa Disyembre 15.

Si Eduardo Montealto Jr., regional director sa Land Transportation Franchising and Regulatory Board, nibutyag nga nihatag og duha ka semana nga lugway ang ilang ulohang buhatan tungod kay daghan pa ang wa mokuha sa cards.

Ang kamandoan sa lugway nadawat sa ilang rehiyonal nga buhatan sa miaging semana.

Sigon niini ang ekstensyon maghatag og igong panahon sa mga franchise holder sa pagtuman ug pagsumitir sa gikinahanglan nga mga dokumento sa pagkuha sa subsidy cards nga karon gisudlan og tag P5,000 matag usa.

Niadtong Disyembre 1 ra unta kutob ang pagpanghatag sa cards ubos sa Pantawid Pasada Program sa gobiyerno, apan gilugwayan kini.

Matod ni Montealto, automatic nga ma-close ang card kon dili makuha ug posibleng dili na masudlan og apil sa dugang fuel subsidy sa sunod tuig.

“Ma-automatic ma-forfeit kay database man na siya. So, dapat maningkamot sila kay kondili nila makuha unya pagkahuman napay irelease sa sunod tuig, maglisod na sila,” dugang ni Montealto dihang nahinabi sa Superbalita Cebu.

Dinhi sa Central Visayas, sa 5,354 ka cards nga unang batch nga nadawat sa LTFRB 7 niadtong Agusto ning tuiga, 2,580 pa lang ang nakuha hangtod niadtong Huwebes, Nobiyembre 29.

“Daghan nami og gibuhat, lainlaing mga pamaagi para daghan lang gyud ang makakuha sa cards, pero low gihapon ang turnout,” dugang sa director.

Apil sa ilang gihimo ang pagtugot sa franchise holder nga makuha ang cards pinaagi sa ilang mga representante gamit ang special power of attorney ug ubang mahinungdanong mga dokumento.

Ang PPP naghatag og ayuda sa mga drayber ug operators sa mga PUJ nga naapektuhan sa pagsaka sa presyo sa lana ug ang taas nga excise tax ubos sa Tax Reform Acceleration and Inclusion (Train) Law.