Drugs gikan sa kaulohan?

Direktor sa Police Regional Office (PRO) 7 Chief Supt. Debold Sinas, nagduda nga gikan sa nakalusot sa Bureau of Customs (BOC) sa kaulohan nga magnetic lifter ang mga nakuhang ilegal nga drugas sa Guadalupe police station sa drug bust sa Barangay Sambag 2, Cebu City niadtong Nobiyembre 30.

Matod ni Sinas, wala pa silay ebidensya nga gihuptan nga ang maong nasakmit nga shabu gikan sa kontrobersiyal nga magnetic lifter busa makig-alayon sila sa Philippine Drug Enforcement Agency (PDEA).

Ang pagduda ni Sinas gibase sa gitug-an sa mga dinakpan na ang ilang druga gikan sa kaulohan.

Atol sa flag raising ceremony sa Cebu City Police Office (CCPO) gipasidunggan ni Sr. Supt. Royina Garma, direktor sa CCPO, ang mga pulis sa Guadalupe ug Pardo police stations human masakmit ang kinilo nga gituohang shabu.

Samtang, si Atty. Wardley Getalla, direktor sa PDEA 7, nagkanayon nga gipaabot nalang nila ang resulta sa imbestigasyon sa CCPO niadtong upat nga nadakpan nga nakuhaan og 3.8 kilos nga gituohang shabu. Pinaagi usab sa laboratory test masayran asa gikan ang

supply sa shabu kung kini gikan sa nakalusot nga magnetic lifter o laing supplier.

“Di natin nadi-discount yun naka possibly yun, alam naman natin na itong Central Visayas particularly itong Cebu Province napaganda ng pwesto sa report ng aming national office marami na ring lugar na nakarating itong mga shabu na galing sa magnetic lifter,” matod ni Getalla. Nabantayan nila nga high grade ang nakuha nga druga sa Barangay Sambag 2. Si Sinas niingon nga mas hingosgan ang kampanya batok sa ilegal nga drugas.