MAG-TREK, SURF SA DAVAO

Dili ra diay ang endangered species nga Philippine eagle ang makit-an sa Davao, labi na sa Davao City.

Kon mogawas ka sa syudad sa Davao, daghang nindot nga talan-awon sa mga kasigbit nga lungsod ug probinsya.

Usa na niini nga labing gidayo ug naghimo og dungog karon sa turismo ang Mati City sa Davao Oriental.

Tulo ka oras gikan sa Davao City, kinsay magdahom nga ang mingaw ug laid-back nga syudad sa Mati adunay white sand beach ug ubang nindot nga talan-awon.

Popular nga destinasyon sa Mati City ang Dahican Beach tungod sa pino nga balas ug tin-aw nga dagat.

Itandi sa ubang kadagatan, all year-round pwede mobisita sa Dahican, summer man o ting-amihan.

Pwede mag-skim board ug mag-surf sa Dahican kon ting amihan o atol sa mga buwan sa Oktobre hangtod Pebrero kay dako ang balud.

Sa P500, maka-surf na ka sulod sa usa ka oras nga adunay kauban nga instructor. Samtang P300 lang sa skim board. Sa Mati City anaa ang sleeping dinosaur. Bungtod kini nga naporma og natulog nga dinosaur.

Adunay view deck nga makit-an lang kilid sa kalsada sa Barangay Badas. Gikan sa Dahican o sa sentro sa Mati City, sakay lang og tricycle ug pahatod sa view deck. Alang sa adventure-seeker, mamahimong mokatkat sa Dino trail.

Usa sab sa gipasigarbo sa Mati City mao ang ilang kawsa sa pagpanalipod sa ilang kinaiyahan sama sa mga pawikan nga ilang giilang endangered.

Kon maswertehan, masaksihan nimo ang pagpangitlog niini ug ang pagpabuhi sa mga gagmayng pawikan sa kadagatan. Asa mo estar? Kon buot mo stay sa Dahican Beach, naglinya ra ang mga hostel daplin sa dagat. Adunay Dahican Surf Resort, Amihan sa Dahican ug uban pa nga nag offer og dormitory type nga room, tent, ug

hammock 300 pesos pataas. Unsaon pag-adto sa Mati? Daghang airline company ang nag-offer og byahe gikan sa Sugbo paingon sa Davao City. Gikan sa Davao City, sakay og V-hire o ba kaha bus sa Ecoland padulong sa Mati City. Ang biyahe mokabat og tulo ka oras. Adunay mga kan-anan ug fast food sa Mati. Aduna sab automated teller machines

(ATM) sa syudad.

Ayaw sipyata pagtilaw sa sinugbang binisayang manok sa Bador’s Restaurant sa Mati. /

CEBU CITY MATI CITY ■ SKIMBOARDING: Ayaw sipyata pagsuway sa skimboarding ug surfing sa Dahican Beach sa mga buwan sa Oktubre hangtod Pebrero.

■ DAHICAN SURF RESORT: Ilado sa mga turista ang Dahican Surf Resort nga anaa ra daplin sa Dahican Beach. ■ DAHICAN BEACH: Bahandi nga matawag sa mga taga Mati City ang Dahican Beach tungod sa pino nga balas ug tin-aw ug blue nga dagat niini.

■ SLEEPING DINOSAUR VIEW DECK: Likayi ang pagsabasaba kon mo stop-over sa sleeping dinosaur view deck sa Barangay Badas, Mati City aron dili makamata ang dinosaur.

■ COSTA LUCAS: Instagrammable nga kapuy-an anaa daplin sa Dahican Beach ang Costa Lucas nga susama sa Brighton didto sa England.

■ DINO TRAIL: Mag trek sa ibabaw sa lawas sa sleeping dinosaur. Mosugat ang view sa kadagatan ug ubang kabungturan.

■ DINO TRAIL: Maka-wow ka sa view nga mosugat nimo samtang gakatkat ka sa bungtod.