Metro Manila Film Festival na sab
Ugma na gyud masaksihan ang gikahinaman sa mga Oslobanon nga pasundayag sa mga banda nga Missing Filemon, Phylum ug ang gikan sa Manila nga Spongecola.
Ang bokalista sa ikatulong banda mao ang bana ni Kapamilyang Karyl nga si Yael. Ang kalihukan kalabot sa kapistahan sa Birhen sa Inmaculada Concepcion sa sunod adlaw.
Sayo sa hapon ugma saulogon ang santos nga misa uban ni Msgr. Jose Palma ug dayon himoon ang prosesyon sa imahen sa mahal nga patona sa Oslob.
Ugma sa gabii, himoon ang pagpili ug pagkorona sa Miss Oslob 2018. Ang akong bets sa Top 3 mao ang misses Pungtod, Mainit ug Luka human nako makita ang mga kandidata sa niaging talents night.
Pila na lang ka adlaw, magsugod na sab ang giatangan sa mga makisine karong panahona: ang Metro Manila Film Festival. Dunay duha ka pelikula nga gituhoan nga mag-ilog sa pagkalabing dakog kita: ang Fantastica ni Vice Ganda ubos sa Star Cinema ug ang Aurora ni Anne Curtis nga hinimo sa Viva Films.
Sa naandan (morag true, haha!), ganahan gyud unta kong motan-aw sa tanang mga entrante sa film festival pero naa man gyuy kontrabid: ang budget! Abi ninyog tawo? Weeey!
Matud sa usa ka tinubdan nga kasaligan, kusog kuno sa takilya ang Three Words to Forever nga gibidahan nila ni Sharon Cuneta ug ni Ormoc Mayor Richard Gomez.
Ang nakalahi ning panagpares ni Sharon ug Richard sa ila ni Aga Muhlach ug Bea Alonzo di pa dugay mao nga duna nay fan base daan ang nahauna. Morag nasayop ang Star Cinema sa pagpares ni Aga ug Bea bisan pulos maayong moarte. Maayo pa seguro untag si Lea Salonga ang gipares ni Aga.
Baya no kon matinuod ang mga panagna, pangagpas ug panghinaut nga malangkat ni Catriona Gray ang korona isip Ms. Universe 2018? Mosamot gyud ang pagtan-aw sa ubang nasud sa Pilipinas isip beauty powerhouse.
Unya masunod usab nato ang record sa Venezuela nga nakadaug og duha ka Ms. U nga nagsunod. Na hala, atong tabangan si Catriona pinaagi sa atong mga pag-ampo.
Kon duna pa moy nahibaw-ang laing paagi nga makatabang ni Catriona, ayaw kanag ihikaw. I-share dayon sa madlang pipol aron mas daghan ang makatabang. Ana lang god!