Aces mobawos sa Hotshots karong gabii

Gihulagway ni Alaska import Mike Harris nga usa ka wake up call ang ilang kapildihan sa Game 1 sa PBA Governors’ Cup finals batok sa Magnolia Hotshot niadtong Miyerkules didto sa Mall of Asia Arena.

Karong gabii, siya malaumon nga mahipugwat na ang kinatibuk-ang puwersa sa Alaska aron mabawsan ang Hotshots nga posibling magtabla sa series, 1-1. Ang duwa motapon nadidto sa Smart Araneta Coliseum.

Si Harris, sa Game One, munasa ginhawang naka 20 puntos ug milangkat og 15 ka rebounds sa ilang kapildihan, 100-84, nga nakapasagmuyo ni coach Alex Compton.

Sa pagsugod pa lang sa duwa, giralihan gilayon sila og 15-0 ug gikan niadto ang Aces daw sa usa ka sundawo nga samdan nga nakigkombati sa Hotshots ug wala na kini makabawi pa.

“It’s a learning experience for us and it helps,” padayag ni Harris. “A lot of these guys haven’t been in the Finals. Good thing it’s first to four, not first to one.”

Ang pagpahait sa opensa ug ang pagminus sa ilang mga turnovers maoy usa sa mga gitun-an sa Aces kagahapon.

Iyang giangkon nga ang maayong pagkaduwa sa iyang counterpart nga si Romeo Travis ug ingon man nila ni Mark Barroca ug Jio Jalalon ang nakahatag og dakong damage sa ilang kapildihan.

Apan alang kaniya, dili bag-o kanila kining maong sitwasyon ug iyang gipasumbingay ang nahitabo sa semifinals round diin naunhan sila sa Meralco Bolts apan mikutlo kini og tulo ka sunodsunod nga daog aron angkunon ang lingkuranan sa finals.