1ST MINGLA INTER COLLEGIATE UGMA
Andam na ang tanan alang sa 1st Minglanilla Mayor’s Cup Inter-collegiate Christmas League basketball tournament nga sugdan ugmang adlawa diha sa Minglanilla Sports Complex, habagatan bahin sa Sugbo.
Lima ka mga teams ang magtigi sa usa ka semanang torneyo nga giatol ning bulan sa kasaulogan sa pasko ug giisip usab nga kabahin sa pagpalambo sa sports sa maong lungsod.
Nangulo sa pagtambong sa panagtigom nga gipahigayon sa Sunburst Fried ChickenMango Avenue sila si Mayor Lani Pena, municipal administrator Concordio Mejias.
Diha usab ang team manager sa USPF Panthers nga si Brian Jereza ug coach Allan Cabatingan, coach Calib Gawangon sa UC Webmasters, coach Leodie Garcia sa USJ-R Jaguars, ug representative sa SWU-Phinma Cobras.
Ang Cesafi champion UV Green Lancers nga atoa pa karon sa Davao City alang sa Philippine Collegiate Champions League (PCCL), kompirmadong mosalmot usab sa torneyo ug moabot ugma.
“First, I would like to thanks sa tanang mga misalmot ning atong tournament. This is part of our program which is aim to promote sports sa atong lungsod. Ug ato na ning himuon kada tuig na,” matod ni Mayor Pena.
Si Mejias, sa iyang bahin, mipasabot nga ang lungsod sa Minglanilla maoy usa sa mga dapit sa Sugbo nga mahiligon kaayo sa basketball.
Tinuod nga adunay tournament sa mga barangay apan kini maoy unang higayon nga nakapaliga og inter-collegiate.
Sa opening day, ang USPF Panthers makigsangka sa Southwestern University (SWU) - Phinma Cobras sa alas 7:30 ang duwa. Sa main game, ang USJ-R Jaguars mosakbang sa UC Webmasters.
Apan dili pa ang proper tournament sa kompetisyon, usa ka exhibition game tali sa Balamban Squad ug Minglanilla Archangels sa 21-years and below category ang ipahigayon sa alas 6 sa gabii.