SPURS GITIPI SA LAKERS
Gibingat sa Los Angeles Lakers ang ilang nagkutay nga kadaugan ngadto sa ikaupat pinaagi sa pagbuntog sa naghingutas nga San Antonio Spurs, 121-113, sa National Basketball Association (NBA) kagahapon.
Si LeBron James mipakatap og 42 puntos alang sa Lakers kinsa nahikawan sa serbisyo ni Brandon Ingram kansang tikod naangol human kini makatunob ni LaMarcus Aldridge sa sayong bahin.
Ang Lakers padayong nag-akupar sa ikalimang dapit nga may 15-9 nga baraha samtang nitibugsok ang Spurs ngadto sa ika-14 nga luna sa Western Conference sa 11-14 nga record.
Sa laing bahin, human maputol ang walo ka sunodsunod nga kadaugan, mibangon og balik ang league-leading Toronto Raptors ug ilang gipukan ang Philadelphia Sixers, 113-102, sa National Basketball Association (NBA).
Si Kawhi Leonard mipabaha og 36 puntos, Jonas Valanciunas midugang og 26, 18 niini sa fourth quarter ug sa kadaugan nga naghatag og 13 ka nagkutay nga kapildihan sa
Sixers sa korte sa Canada. Niadtong Lunes, ang Raptors nipildi sa Denver apan kagahapon narehistro sa Raptors ang 21-5 nga record sa
NBA ug misaka sa 11-3 nga baraha diha sa ilang korte.
Human sa tulo ka quarters, ang Raptors naglabaw, 78-77 sa wala pa kini magtabla, 81-all sa
hook shot ni T.J. McConnell, sa sayong bahin sa fourth quarter.
Apan nagsugod ang kahayag sa kadaugan habig sa Raptors sa dihang mipahagsa og 9-0 nga rally ang Toronto.
Samtang mipabuga si Stephen Curry og siyam ka triples sa iyang kinatibuk-ang 42 puntos, midugang og 25 si Kevin Durant sa dihang gilubong sa defending champion Golden State Warriors ang naghingutas nga
Cleveland Cavaliers, 129-105.
Dihay higayon nga sulod lang sa usa ka minuto sa fourth quarter, si Curry nakakulit og nuebe puntos alang sa ilang ikawalo nga kadaugan batok sa ilang kanhi karibal sa finals.
Ug kadto maoy unang pagbisita sa Warriors sa luna sa Cavaliers sukad ilang giharos ang Cleveland alang sa ilang ikatulo nga titulo sa upat ka tuig.
Hinuon niadtong panahona, diha pa si LeBron James sa Cleveland.